Jumys ornymyzǵa arnaıy at basyn burǵan soǵys ardageriniń uly «Ákeme degen saǵynyshym men qurmetimdi gazet betinde kórsetsem degen nıetpen keldim», dedi. Aıtýynsha, ákesi maıdan dalasynda eki ret aýyr jaraqat alsa da, alǵy shepten qaıtpaǵan.
«Men ákemmen maqtanamyn. Ol kisi 1911 jyly qazirgi Baızaq aýdanynyń burynǵy Tespe aýylynda kedeı otbasynda dúnıege kelgen. Atam Sarsha baıdyń jalshysy retinde qyzmet etse, ájem úı sharýasynda júrgen. Ákem medresede eskishe saýat ashypty», deıdi ol.
Amanǵalı Sarshaev keltirgen derekke júginsek, ákesi Almatydaǵy joǵary partııa mektebin 1934 jyly aıaqtaǵan. Keıinnen qazirgi Abaı oblysyna qarasty Tasbulaq keńsharynda ferma meńgerýshisi bolyp eńbek jolyn bastapty. Arada az ýaqyt ótkende Merki aýdanyndaǵy Kýzmınka mektep-ınternatyna dırektorlyqqa taǵaıyndalyp, týǵan jerge oralǵan. Sondaı-aq Qazaqstan, Tátti aýyldaryndaǵy mektepterdi de basqarǵan.
«Ákem 1942 jyly maıdanǵa attanǵan. Eýropanyń biraz elin jaýdan azat etý barysynda eki ret aýyr jaraqattanǵan. Soǵan qaramastan gospıtaldan shyqqan soń, qaıta aldyńǵy shepke Germanııanyń Valdenbýrg qalasynda jeńis sherýine qatysqan. Ákemniń maıdan dalasyndaǵy erligi eskerýsiz qalǵan joq. Birqatar orden-medalmen marapattalǵan. Elge oralǵannan keıin burynǵy Sverdlov aýdanyndaǵy birqatar mektepte dırektor qyzmetin atqardy. 1949 jyly soǵys kezinde alǵan aýyr jaraqaty syr berip, máńgilik mekenine attandy», deıdi A.Sarshaev.
Ákesi týraly málimet izdegen Amanǵalı aǵa Reseı Qorǵanys mınıstrligine hat ta joldaǵan eken. Mınıstrliktiń muraǵatynan jetken málimette leıtenant Saparbaı Sarshaevtyń maıdanda 1239-atqyshtar polkiniń dıvızııa quramynda bolǵany, soǵys kezinde kórsetken erligi baǵalanyp, «Japonııany jeńgeni úshin», «Germanııany jeńgeni úshin» sekildi ózge de birqatar orden-medal alǵany týraly derek keltirilgen.
«Ol kisi bizge árqashan er azamat úshin Otan qorǵaýdan asqan mindet joq ekenin aıtyp otyratyn. Ákemniń ǵıbratqa toly áńgimelerin men endi óz nemerelerime jetkizýshimin. Maıdanda eren erlik kórsetken asqar taýymnyń ómir joly qaı kezde de úlgi bolyp qala beredi», deıdi A.Sarshaev.
TARAZ
