Foto: akorda.kz
«Memlekettik tilge qatysty Prezıdentimizdiń ustanymy belgili. Qasym-Jomart Kemeluly – naǵyz til janashyry. Sondyqtan Prezıdentimizdiń saıasaty – memlekettik tildiń damýyna naqty ispen qoldaý kórsetý jáne bul salada qandaı da bir spekýlıasııa men arandatýǵa jol bermeý», dep málimdedi QR Prezıdenti Ákimshiliginiń Basshysy A.Dádebaı.
Aıbek Dádebaıdyń aıtýynsha, qazaqtyń qazaqsha ǵana sóılemeı, oryssha, aǵylshynsha, qajet bolsa, basqa tilderdi jetik meńgerýi – bul ulttymyzdyń artyqshylyǵy.
«Qadyr aqyn aıtpaqshy, biz óz tilimizdi qurmetteýge mindettimiz, al ózge tildiń bárin bilýge umtylýymyz kerek. Qazaqtyń qazaqsha ǵana sóılemeı, oryssha, aǵylshynsha, qajet bolsa, basqa tilderdi jetik meńgerýi – bizdiń ulttymyzdyń artyqshylyǵy. Ál-Farabı babamyz 70 til bilgen desedi, sonyń arqasynda ol telegeı teńiz bilim jınady, álemniń «ekinshi ustazy» atandy.
Buǵan qosa, bizdiń elimizde eshkimdi sóıleıtin tiline baılanysty kemsitýge, qýdalaýǵa nemese qandaı da bir qysym jasaýǵa jol berilmeıdi. Bul – memleketimizdiń negizgi zańy – Ata zańda jazylǵan norma. Biz damyǵan el bolamyz desek, búkilhalyqtyq referendýmda qabyldanǵan konstıtýsııa normalaryn qatań saqtaýymyz kerek», dedi QR Prezıdenti Ákimshiliginiń Basshysy A. Dádebaı.
Ol zertteýlerge sáıkes, qazir eldegi memlekettik tildi meńgergen azamattar sany 81%-dan asqanyn atady. Qansha til bilseń, sonsha álemge esik ashylady deıdi.
«Demek, bul óz tilińdi qurmettep, ózge tildiń bárin bil degen ustanym», dep A.Dádebaı Prezıdent jastardyń da birneshe tilde sóıleıtinin jáne olarǵa senim artyp otyrǵanyn aıtty.
