Negizgi UBT 16 mamyrda bastalady

Ulttyq testileý ortalyǵynyń habarlaýynsha, tótenshe jaǵdaı jarııalanǵan 6 óńirde (Aqmola, Aqtóbe, Atyraý, Batys Qazaqstan, Qostanaı, Soltústik Qazaqstan oblystary) tirkelý ýaqyty 20 mamyrǵa deıin uzartyldy jáne UBT 25 mamyr men 12 shilde aralyǵynda ótkiziledi. Ǵylym jáne joǵary bilim mınıstrliginiń sheshimi boıynsha 2024 jyly talapkerler negizgi UBT-ny eki ret tapsyryp (eki sertıfıkat ta jaramdy), eń úzdik nátıjemen grant konkýrsyna qatysa alady. UBT-ǵa qatysý úshin Ulttyq testileý ortalyǵynyń app.testcenter.kz saıty nemese UTO qosymshasy arqyly tirkelýge bolady. Talapkerler testileý kúnin, ýaqytyn jáne tapsyratyn ornyn ózderi tańdaıdy. Alaıda olar eki múmkindik úshin beıindi pánderdiń bir ǵana kombınasııasyn tańdaıdy. Negizgi UBT-ny 2024 jylǵy mek­tep jáne kolledj túlekteri, mek­tep já­ne kolledjdiń ótken jylǵy tú­lek­teri, shetelde 11(12)-synyp bi­lim alýshylary, qandastar, jo­ǵa­ry oqý oryndarynda shartty túr­de bilim alýshylar tapsyra alady.

Talapkerlerdiń negizgi UBT-ǵa da­ıyndyǵyn jaqsartý maq­satynda osyǵan deıin ár pán boıyn­sha jeke taqyryptyq tal­daý engizil­di. Taldaýda ár UBT-dan keıin (qań­tar, naýryz) túlekterge jeke taqyryptar boıynsha bilimin arttyrý usynylady. Sonymen qatar birinshi múm­kin­dikti tapsyrǵannan keıin olar ekinshi múmkindikke deıin daıyndyǵyn jaq­sar­ta alady. Odan bólek, onlaın baı­qaý synaqtary iske qosylǵan.

Bilim berý ortalyqtarymen birlesip uıym­dastyrylǵan tegin onlaın sabaq­tar jalǵasyp jatyr. Al oqý jy­lynyń basynda Ulttyq testileý orta­lyǵynyń saıtynda test tapsyrmalary qurastyrylǵan oqýlyqtar tizi­mi men test jospary; «Qazaqstan tarıhy» jáne «Dúnıejúzi tarıhy» pánderi boıynsha 100 tarıhı data tizimi; «Informatıka» páninen termınder tizimi; «Qazaq ádebıeti» jáne «Orys ádebıeti» boıynsha ádebı shyǵarmalar tizimi jarııalandy.

Testileý formatynda ózgerister joq. 2024 jylǵy talapkerler úsh mindetti jáne tańdaý boıynsha eki pánnen test tapsyrady. «Oqý saýattylyǵy» men «Matematıkalyq saýattylyq» mindetti pánderinen tapsyrmalar sany 5 suraqqa qysqardy. Bul beıindi pánder boıynsha su­raqtar sanyn 40-qa deıin arttyrýǵa múmkindik berdi. Sonymen qatar beıindi pánderde berilgen tizimnen sáıkestikti anyqtaýǵa arnalǵan 5 tapsyrma qosyldy. Osylaısha, UBT tapsyrmalar sany ózgerissiz qalady, jalpy – 120 suraq. Onyń ishinde «Qazaqstan tarıhynan» 20 tapsyrma, «Oqý saýattylyǵynan» 10, «Matematıkalyq saýattylyqtan» 10 jáne eki beıindi pán boıynsha 40 tapsyrma beriledi. Joǵary ball – 140, bul da ózgerissiz qaldy. Testileýdiń jalpy ýaqyty – 4 saǵat (240 mınýt). Al erekshe bilim berý qajettilikteri bar balalarǵa qosymsha 40 mınýt ýaqyty saqtalady.

Akademııalyq adaldyqty qam­ta­masyz etý maq­satynda test nus­qalary tańbalanǵanyn atap ótken jón. Iаǵnı UBT-ǵa qatysýshylardyń árqaısysynyń jeke test nusqasy bolady. Osyǵan qosa kalkýlıator, Hımııalyq elementterdiń perıod­tyq júıesi men tuzdardyń eri­gishtik kestesin kompıýterde qol­danýyna ruqsat. Talapkerlerdiń pikiri men qalaýyn eskere otyryp, olarǵa kestelerdiń qaǵaz nusqasy da beriledi.

Shekti upaı da ózgergen joq: «Quqyq» jáne «Pedagogıkalyq ǵy­lym­dar» bi­lim berý salalary úshin keminde – 75, «Den­saýlyq saqtaý jáne áleýmettik qamtamasyz etý (me­­dı­sına)» keminde – 70, «Aýyl sha­rýa­shylyǵy jáne bıoresýrstar», «Veterınarııa» keminde – 60 (ulttyq ýnıversıtetter úshin); ulttyq joǵary oqý oryndaryna túsý úshin keminde – 65, basqa joǵary oqý oryndaryna keminde 50 upaı jınaý kerek.

Test tapsyrýshylar testileý aıaqtal­ǵannan keıin 30 mınýt ishinde apellıasııaǵa ótinish berýine bolady. Sertıfıkat appelıasııalyq komıssııanyń sheshiminen keıin talapkerdiń jeke kabınetinen kóre alady.