Fotosýretterdi qaıtys bolǵan balanyń otbasy usyndy
Balanyń týystary jol-kólik oqıǵasyna kináli adam jaýapkershilikten qutylýy múmkin ekenine alańdaýly.
Qaıtys bolǵan balanyń tátesi qaıǵyly oqıǵa 10 mamyr kúni Saımasaı aýylyndaǵy úıdiń mańynda bolǵanyn habarlady.
«Bala jol jıeginde oınap otyrǵan. Kólikte jolǵa emes, telefonǵa qarap otyrǵan áıel sol kezde jyldamdyǵyn asyrdy. Kólik jol jıegine, dál bala otyrǵan jerge shyǵyp ketip, ony qaǵyp ketken. Tipti oqıǵa ornynan qashyp ketpekshi boldy, munyń bárin kórshiler de kórdi. Al kelinshek kóliginen de túsken joq», deıdi balanyń týystary.
Olardyń aıtýynsha, bala birden kóz jumdy. Alaıda jol apatynan keıin polısııa qyzmetkerleri kinálini ustamady.
«Ol tipti balanyń ata-anasyna da kelmedi, kinásin moıyndamady. Jol-kólik oqıǵasyna baılanysty saraptamalar jasalǵan joq. Polısııa qyzmetkerleri kólikten qandy súrtip qoıǵan, balanyń aıaq kıimderin múldem basqa baǵytta qoıyp qoıǵan, tipti jol jıgenide otyrǵan balanyń sýretin tasjolǵa salyp qoıǵan», deıdi marqum balanyń naǵashysy.
Anyqtalǵandaı, kólik tizgindegen áıel mektepte muǵalim bolyp jumys istegen.
Almaty oblysynyń Polısııa departamenti 10 mamyrda Saımasaı aýylynda adam ólimimen aıaqtalǵan jol-kólik oqıǵasy bolǵanyn rastady.
«Saımasaı aýylynda «Opel-Astra» kóliginiń júrgizýshisi jolǵa shyǵyp ketken jas balany qaǵyp ketti. Kámeletke tolmaǵan bala esin jımaı, aýrýhananyń jansaqtaý bóliminde kóz jumdy», dep habarlady polısııa qyzmetkerleri.
Jol-kólik oqıǵasyna qatysty qylmystyq is qozǵaldy. Qajetti saraptamalar taǵaıyndaldy.
