О́rmekti ónimge suranys joǵary

Mata óz maqtamyzdan

Eldegi toqyma ónerkásibi kóshbas­shylarynyń biri sanalatyn bul kompanııa ónimderin Qytaıǵa jáne TMD men Eýropanyń jetekshi elderine eksporttaıdy. «AZALA Textile» memlekettik qorǵanys tapsyrysymen eldegi quqyq qorǵaý organdaryna kıim tigýge arnalǵan kostıým jáne kóılek matalaryn shyǵaratyn jalǵyz otandyq kásiporyn bolyp otyr.

«Sapasyna sáni saı daıyn ónim­deri­miz naryqtaǵy óz oryn joǵalt­qan joq. Kerisinshe, aldymyzdan jańa múmkindikterdiń joly ashylyp jatyr», deıdi «AZALA Textile» kombınatynyń dırektory Beket Dáýlethanuly.

Maqta matasyn óndirý úshin ká­siporyn ońtústik óńirdiń otandyq maq­­tasyn paıdalanady. Al kómekshi shıkizatty (boıaǵyshtar, hımııalyq zattar, baıytý materıaldary) Germanııa, Túrkııa, Úndistan, Ýkraına, Reseı, О́zbekstan sııaqty alys-jaqyn shetelderden satyp alady. Maqta matasyn shyǵarý úshin maqta talshyǵy jetkilikti. Biraq maqta matadan bólek, aralas matalar da shyǵarady.

«Osynaý aýqymdy isti ózimizdiń otandyq mamandar atqaryp jatyr. Áıtse de, salanyń kásibı bilgirleriniń tájirıbesi qajet bolatyn sátter de bolady. Keı jaǵdaıda otandyq mamandardy daıyndaý deńgeıi zaýyttyń tolyq qýatynda jumys isteýi úshin jetkiliksiz bolýy múmkin. Bul bilim berý baǵ­dar­la­masynyń joqtyǵynan, prak­tı­kalyq tájirıbeniń jetispeý­shi­liginen nemese bilikti mamandardyń qyzmet aýystyrýynan. Bul jaǵdaı zaýyttyń tıimdi jumys isteýine keri áser etedi», deıdi kásiporyn basshysy.

Memleket tarapynan otandyq kásip­ker­lerge jeńildikter jasalyp, qoldaý kór­setilip jatyr. Ondaı qoldaýdyń shara­patyn «Azala Textile» kompanııasy da kórdi.

«Birqatar salyqtan bosatyldyq. Je­ńil­detilgen nesıelerge de qolymyz jetti. Qazir Qazaqstan damý bankinen bólin­gen qarjylaı kredıttermen ju­mys istep jatyrmyz», deıdi kombınat dırektory.

Kásiporynda 450 adam jumys isteıdi. Qyzmet­kerlerge qolaıly jaǵdaı jasal­ǵan. Eńbek quqyǵy jaqsy qorǵalǵan. Kompanııa qaýipsiz jumys ortasyn, ádil jalaqyny, jeńildikter men mansaptyq ósý múmkindikterin qamtamasyz etý úshin barlyq qoldanystaǵy eńbek zańnamasy men erejesin saqtaıdy. Eńbek jaǵdaıy boıynsha attestattaý negizinde zııan­dy jumys ornynda isteıtinder eńbek­aqy­sy­na 30% ústeme alady.

Kombınat óndirgen ónimderdiń negizgi tutynýshylary – áýelden uzaq merzimge kelisimshartqa otyryp, áriptes retinde jumys isteıtin sheteldik seriktesteri. Eksportqa óńdelmegen matalar jónel­tiledi. Bir ókinishtisi, kombınat tolyq qýa­tymen jumys isteý jaǵdaıyna áli jete qoıǵan joq. Negizi bir jylda 4,5-5 myń tonna shıkizat alyp, ony tolyq óńdep shyǵarýǵa múmkindigi bar. Kompanııa basshylyǵy ondaı jaqsy kúnge jetýdiń josparyn kezeń-kezeńge bólip, naqty júıesin túzip qoıǵan. Qazir óndiristik qýattyń 40%-na jýyǵy ǵana jumys istep turǵandyqtan jylyna 2,5 myń tonna shıkizat alyp, sodan daıyn ónim jasap shyǵaryp jatyr. Onyń 60%-y alys-jaqyn shetelderge eksporttalady.

Maqta mata ónimderi bizdiń elge syrttan da kóp ákelinedi. «Azala Textile» kompanııasy shyǵaryp jatqan tósek-jabdyq jıyntyqtary Qytaı, Túrikmenstan, О́zbekstan elderinen ákelip satylady.

«Oǵan tosqaýyl qoıý oıymyzda joq. О́ıtkeni naryqta naqty óz ornymyzdy alýǵa áreket jasap jatyrmyz. Qazir elektrondy satyp alý úrdisi qatty damyp keledi. Onlaın-dúkenderge – «Kaspi Market», «Halyk market»-ke óz ónimderimizdi salyp jatyrmyz. Jaqyn arada reseılik marketpleısterge de ónim shyǵarýdy kózdep otyrmyz. Tabıǵı ónimderge suranys únemi bolady jáne biz jasap jatqan ónimder óz baǵasyna laıyqty ekenine senimimiz kámil», dedi B.Tursynhanov.

Aıtýynsha, kompanııanyń keleshek damý josparyn qalaı quryp, qandaı naryqta jumys isteýiniń bári shyǵarǵan ónimdi sata bilýge kelip tireledi. Áý basta tósek-jabdyqtary men oramal sııaqty maqta matalaryn shyǵarsa, 2015 jyly boıaý, árleý jáne tigin sehyn iske qosty. Qazir kostıýmdik matalar men arnaıy kıimge arnalǵan matalar shyǵarýdy negizgi baǵyt etip otyr.

Azalalyqtar aıtylǵan jumystarmen ǵana shektelip qalmaı, kompanııany damytýdyń túrli jolyn izdestirip júr. Máselen, jer qoınaýyn paıdalanýshy kompanııalarmen de kelisim jasalyp jatyr. Olarǵa qajet zattardy zerttep, zerdelep suranystaryn naqty bilip, soǵan saı jumys atqarýda. Qorǵanys mınıstrligi men Ulttyq ulannyń da áskerı kıim-keshegin tigip berip, sura­nysyn qanaǵattandyryp otyrǵan osy – «Azala Textile» kompanııasy.

«Maqtadan jasalǵan ónimderge degen suranys qaı ýaqytta da kemi­meı­di. Sondyqtan marketıngtik jumysty kú­sheıtip, turaqty tutyný­shyla­ry­myz­dy qajetti ónimmen qamtamasyz etýge baǵyttalǵan jobalardy damyta beremiz», dedi B.Tursynhanov.