Analar kúnin toılady

Mereke qarsańynda Astana qalasynda otbasy ınstıtýtyn nyǵaıtýǵa baǵyttalǵan birneshe is-shara uıymdastyryldy. Sonyń biri retinde «Otbasy – baqyt mekeni» degen ataýmen ulttyq taǵamdar ázirleýden ótken sheberlik sabaǵyn aıtýǵa bolady. Sheberlik sabaǵyna qatysqan analar tájirıbeli aspazdardan sabaq alyp, bir kúnde taǵamnyń túr-túrin ázirledi. Merekeni óz deńgeıinde atap ótýge Astana qalasy ákimdigi janyndaǵy Áıel­der isteri jáne otbasylyq-demo­gra­fııalyq saıasat jónindegi komıssııamen qatar Jastar saıasaty máseleleri jónindegi basqarma qoldaý kórsetken.

Sheberlik sabaǵynda Astana qalasy ákimdigi janyndaǵy Áıel­­der isteri jáne otbasylyq-de­mog­rafııalyq saıasat jónindegi komıssııanyń hatshysy Qarlyǵash Sarkenova is-sharanyń mán-maz­munyn aıtyp, analardy quttyq­tady.

«Analar aspazdardyń sheber­lik sabaǵyna qyzyǵady. Mun­daı is-sharalar olardyń táji­rıbe almasyp, birin-biri qoldaı alatyn jas analar qaýymdastyǵyn qurýǵa yqpal etedi. Qatysýshylardyń ózin-ózi baǵalaýyn, senimdiligi men kásibıligin damytýǵa yqpal­da­sady. Sondaı-aq olardyń shy­ǵar­­mashylyq áleýetin ashýǵa kó­mektesedi. Demek biz mundaı mazmundy, mańyzdy bastamalardy qoldaýymyz qajet», dedi Q.Sarkenova.

Qatysýshylardyń arasynda aǵylshyn tili pániniń oqytýshysy Mádına Myrzanova da bar. Ol sheberlik sabaǵynda tájirıbeli aspazdyń jumysyn baqylap, taǵam daıyndaýdyń buryn-sońdy elemegen qyr-syryna qanyqqanyn aıtty.

– Búgin mereke qarsańynda uıymdastyrylǵan sheberlik sabaǵyna 12 jas ana keldik. Árıne, árqaısymyz as ázirleýden tájirıbemiz bolǵanymen, keıde ońaı nárseni elep-eskere bermeıtin tustarymyz bolady eken. Bir taǵamdy daıyndaýdyń bir emes, birneshe joly bolýy múmkin. Mine, osy sekildi suraqtarymyzdy búgin Astana qalasynyń Shef-aspazdar qaýym­das­tyǵynyń múshesi Araılym Qalbaevaǵa qoıdyq. Nebir dám­di taǵamdardy daıyn­daý­dyń qupııa­syn meńgerýge tyrystyq, – deıdi M.Myrzanova.

Sheberlik sabaǵyna kelgen analar merekelik taǵam­dar­dy daıyndaýdyń qyr-syryn úıret­ken tájirıbeli tálim­gerlerge alǵys aıtýdy umyt­pady. Merekege oraı Astana qala­synda kásibı otbasylyq psıhologteriniń qa­tysýymen jas otbasylarǵa ar­nal­ǵan semınar-trenıngter, aspazdyqtan, sýret salýmen qatar qysh-qumyra jasaýdan kýrs ótti. Sondaı-aq «Kóńildi start» sporttyq otba­sylyq estafetasy, «Úzdik jas otbasy» baıqaýy uıym­das­tyryldy.