Búginde Almaty oblysynda Ekinshi dúnıejúzilik soǵysqa qatysqan 7 maıdanger turady. Atap aıtar bolsaq, Qonaev qalasynda turatyn 104 jastaǵy Oksana Betebaeva, 101 jasqa kelgen Talǵar qalasy men Ile aýdanynyń turǵyndary Vıacheslav Legostaev pen Táńirbergen Tolǵanbaev, Uıǵyr aýdany Kishi Aqsý aýylynda turatyn ǵasyr jasaǵan Alym Kıbırov, Eńbekshiqazaq aýdanyndaǵy júzge taıaǵan Soltanbaı Jaryqbasov, Jambyl aýdanynan 97 jastaǵy Fedor Kovalev, osy jasqa tolatyn Qarasaı aýdanynyń turǵyny Pavel Polovoı Jeńis kúnin qarsy alyp otyr. Mereke qarsańynda soǵys ardagerlerine aıryqsha qurmet kórsetilip, azyq-túlik sebetteri tabys etildi. Oblys ákimdiginiń sheshimimen ardagerler 2 mln teńgeden aldy.
Urpaqqa Jeńis syılaǵan ardagerlerdiń biri Eńbekshiqazaq aýdanynyń Qurmetti azamaty Soltanbaı Jaryqbasov búginde 100-ge taıady. Alapat soǵys dalasynan aman oralyp, sanaly ǵumyryn urpaq tárbıesine arnaǵan ardager búginde báıterekteı tamyryn tereńge jaıyp, bala-shaǵa men nemere-shóbereleriniń, aýyldastarynyń ardaqtysyna aınalǵan.
Ile aýdany Alǵa aýylynda 1925 jyly ómirge kelgen Soltanbaı Jaryqbasov 1943 jyly Ile aýdandyq áskerı komıssarıattan shaqyrý qaǵazyn alyp, maıdanǵa attanǵan. Sol jyldyń qańtarynda Tashkenttegi mergender kýrsynda oqyp, sáýir aıynda áskerge attanǵan sarbaz Zabaıkale maıdanyndaǵy 25-qyzyl týly mehanıkalandyrylǵan brıgadanyń quramynda 1-batalony, 1-rotasynyń pýlemet bólimshesiniń komandıri bolǵan. Japondarǵa qarsy soǵysqa qatysqan. Maıdanda mergendigimen kózge túsip, talaı erlik jasaǵan.
Soǵystan soń Reseıdiń Novosibir oblysy Krasnozemsk aýdanynyń «Pravda» ujymsharynda traktorıst bolǵan. 1950 jyldyń sáýirinde týyp-ósken aýylyna oralyp, ujymshardyń esep komıssııasynyń tóraǵasy qyzmetin atqarady.
Eńbek ete júrip, Túrgen pedagogıkalyq ýchılıshesin, Qazaq pedagogıkalyq ınstıtýtynyń tarıh fakýltetin syrttaı bitirgen. Alǵashqy eńbek jolyn sol kezdegi Alekseevka, Klıýchı ortalaý mektepterinde muǵalim bolýdan bastaǵan S.Jaryqbasov keıin Alǵa bastaýysh mektebiniń meńgerýshisi, on jyldan astam ýaqyt, ıaǵnı zeınetkerlikke shyqqanǵa deıin mektep basshysy qyzmetterin abyroımen atqardy. 1992 jyldan beri Báıterek aýyldyq okrýgi aqsaqaldar alqasynyń tóraǵasy bolyp, eline eleýli eńbek sińirgen.
Maıdanger Soltanbaı ata II dárejeli «Dańq» ordeni, «Eńbektegi erligi úshin», «Otan soǵysy» ordenimen, Jeńistiń mereıtoılyq medaldarymen marapattalǵan. Aqsaqal segiz balasynan nemere, nemerelerinen shóbere súıip úlken áýletke aınalǵan. Ustazdyq eńbegimen el balasyn ǵana emes, óziniń kindiginen taraǵan urpaqtaryn da meıirimdi, qaıyrymdy, bilimdi de bilgir bolýǵa tárbıelegen ardagerdiń áýleti 2014 jyly Almaty oblysy boıynsha «Mereıli otbasy» ataǵyna ıe boldy. Bul kúnde Alǵa aýylynyń danagóıine aınalǵan qarııany el-jurty qadirlep, aq batasyn alyp júr.
«Menen buryn ákem men eki aǵaıym soǵysqa ketken edi. Sondyqtan meni eshkim maıdanǵa shyǵaryp salǵan joq. Jalǵyz ózim surapyl soǵysqa bara jatyp: «Eger aman qaıtsam, úrim-butaǵymdy ósiremin», dep ózime sert ettim. Jaratqan osy tilegimdi qabyl etse kerek, qazir bala-shaǵanyń ortasynda baqytty ómir súrip jatyrmyn. Eki aǵam soǵystan qaıtpady. Al ákem 1944 jyly maıdannan jaraly oraldy. Keıin suraý salyp, eki baýyrymnyń soǵysta qaza bolyp, baýyrlastar zıratyna jerlengenin bildim. Soǵys eshkimdi aıamady. Qazaq «ornynda bar ońalar» degen, sol bir surapyl jyldardy da eńserdik. Endi zamanymyz tynysh bolyp, Táýelsiz elimizdiń tuǵyry bıiktep, aıbyny arta bersin», deıdi ǵasyr jasaǵan maıdanger.
Almaty oblysy
