10 mamyr kúni Reseıdiń mádenı astanasy Sankt-Peterbýrg qalasynda jolaýshylar avtobýsy Moıka ózenine batyp, úsh adam ajal qushqany málim. Osy bir tótenshe jaǵdaı kezinde aýyr apatqa tap bolǵandardy shuǵyl qutqarýǵa umtylǵandar ishinde jerlesimiz Erhan Ahanov ta bar.
– Birinshi shynjyrdan ustap Daǵystan eliniń azamaty tómen túse bastady, sońynan men erdim. Biz sýdyń túbine syrǵyǵanda, avtobýs júrgizýshisi esikti ashýǵa umtyldy. Biraq talpynǵanymen túk te shyqpaǵan soń, qasymdaǵy jigit ekeýimiz esikti ashyp úlgergenimizde ózge jigitter de kómekke jetti. О́zderińiz biletindeı, bizdiń qazaq jigitteri kómek berýge árqashan daıyn turady, – deıdi Erhan Ahanov.
Erhan halyqtyq qutqarýshylarmen birge júrgizýshini, egde jastaǵy er men áıeldi sýdan alyp shyǵyp, alǵashqy medısınalyq kómek kórsetken. Jerlesimiz bul erligin batyrlyq emes, kádimgi azamattyq boryshym dep esepteıdi.
Aıta keteıik, osy oqıǵadan soń «Qutqarýdaǵy erligi úshin» medalmen 15 azamat marapattalǵan. Adam taǵdyry úshin Poselýev kópirinen muzdy sýǵa sekirgen batyrlarǵa Sankt-Peterbor qalasynyń gýbernatory Aleksandr Beglov arnaıy kelip salalyq marapatty tabystady. Qutqarýshylar arasyndaǵy eń jasy – 25-tegi qazaq balasy Erhan Ahanov týraly Reseı Federasııasynyń búkil aqparat quraldary jazdy.
