Foto: 24.kz
Moped júrgizýshileri jol qozǵalysynyń tolyqqandy qatysýshylaryna teńestirildi.
Ákimshilik quqyq buzýshylyq týraly kodekske tıisti ózgerister engiziledi. Endi moped tizgindegender de ýákiletti organda mindetti tirkeýden jáne jyl saıynǵy tehnıkalyq baıqaýdan ótý kerek. Sonymen qatar azamattyq-quqyqtyq jaýapkershiligin mindetti saqtandyrýy tıis.
Moped júrgizýshilerine qoıylǵan jańa talap – «A1» sanatyndaǵy júrgizýshi kýáligin alý. Ol «A», «V» jáne «S» sanatyndaǵy júrgizýshilerge qosymsha daıyndyqsyz avtomatty túrde usynylady. Qazirgi ýaqytta moped mingenderge júrgizýshi kýáligin alý úshin 6 aı ýaqyt beriledi.
«Bul rette moped júrgizýshileri de avtokólik júrgizýshileri sııaqty jaýapkershilikke tartylady. Buryn jol qozǵalysy erejelerin buzǵany úshin olar basqa jol qozǵalysyna qatysýshylar sııaqty ÁQBtK-niń 615-babyna sáıkes 2 AEK mólsherinde aıyppulmen jazalanatyn. Endi ereje qabyldanǵannan keıin avtokólik júrgizýshileri sekildi moped júrgizýshilerine de barlyq jaýapkershilik júkteledi. Máselen, tyıym salynǵan baǵdarshamnan ótkeni úshin Ákimshilik quqyq buzýshylyq týraly kodekstiń 599-babynda kózdelgen 10 AEK kóleminde aıyppul salynady», delingen Májilis habarlamasynda.
Qazir mas kúıinde moped júrgizý ÁQBtK-niń 440-baby boıynsha jaýapkershilikke tartylady. Oǵan sáıkes qoǵamdyq oryndarǵa mas kúıinde shyqqandarǵa 5 AEK kóleminde aıyppul salynady.
Ereje qabyldanǵannan keıin moped júrgizýshileri kólik quralyn alkogoldik mas kúıde basqarsa ákimshilik jaýapkershilikke tartylady. Bul bap boıynsha 15 táýlikke ákimshilik qamaqqa alý jáne 7 jyl merzimge kólik quralyn basqarý quqyǵynan aıyrý jazasy qarastyrylǵan.
