Foto: freepik.com
Eńbek resýrstaryn damytý ortalyǵynyń (ERDO) sarapshy mamandary bilikti kadrlarǵa degen suranysty eksheı kele, besjyldyqta zárýligi aıqyn bilinetin 25 mamandyqty atady. Esepshiler (93 myń adam), kúzetshi, ınkassator (77 myń), dúken satýshylary (77 myń), kólik júrgizýshileri (44 myń), áleýmettik ǵylymdar mektep muǵalimderi (35 myń), kútim boıynsha ortasha medısınalyq personal (33 myń), balabaqsha tárbıeshileri (32 myń), jaratylystaný ǵylymdary boıynsha orta mektep muǵalimderi (31 myń), jalpy beıindi keńse qyzmetkerleri (30 myń), bastaýysh synyp muǵalimderi (26 myń) aldyńǵy ondyqta tur. Buǵan qosa mekeme, uıym, kásiporyndardyń basshysy laýazymyna da jetekshi jetispeýshiligi sezilýi múmkin. Jyljymaıtyn múlik agentteri, júk kóligin jáne avtobýs júrgizýshileri, taksı qyzmetin usynýshylar, aspaz, qurylys salasyndaǵy árleýshi, santehnık te taptyrmaıtyn maman ıesi atanbaq.
Bazalyq ssenarıı boıynsha jaldamaly jumys kúshine zárýlik te kúsheıedi. Mamandar 7 jyldyń ishinde optımıstik ólshemmen alǵanda kadrlarǵa degen qoǵamnyń suranysy kúrt artyp, 2,2 mıllıon adamǵa jetýi múmkin degen baılam jasaıdy. Al pessımıstik ssenarıı boıynsha 1,2 mıllıon adam bolýy múmkin. Ýrbanızasııa úsh megapolıs – Almaty, Astana, Shymkent qalalarynda qarqyndy júretindikten de jaldamaly jumyskerlerdiń qajettiligi eselep artyp, respýblıkalyq kórsetkishtiń 26%-yna jetedi dep boljanyp otyr. Ortalyq pen shyǵys jáne soltústik óńirlerde jumys kúshine suranys basqa oblystarmen salystyrǵanda aıtarlyqtaı tómen bolmaq. Eńbek resýrstaryn damytý ortalyǵynyń dırektory Dmıtrıı Shýmekov jaldamaly jumyskerlerge degen suranys 2027 jyly kúrt artyp, boljamdy qajettilik 285 myń adamǵa jetedi degen pikir aıtady. Al 2030 jyly suranysqa ıe kadrlar 288 myń adamǵa kóbeımek. Qoǵamdyq qyzmet sektorynda jaldamaly jumyskerlerge suranys bilim berý, densaýlyq saqtaý, memlekettik basqarý salasynda eselep artyp, 248 myń adamnan 641 myń adamǵa jetýi múmkin. Sondaı-aq taýarlardy tasymaldaý, taratý órisinde jumysshylarǵa suranys joǵary bolady. Aqparat jáne baılanys, qarjy sektory, saqtandyrý, jyljymaıtyn múlik operasııalary, kásiptik jáne ǵylymı qyzmet, ákimshilik mamandaryna da suranys ulǵaıady. О́nerkásip, qurylys, aýyl sharýashylyǵy syndy baǵyttarda da jumys kúshiniń qajettiligi aıqyn ańǵarylady.
