Sýretti túsirgen – Vıktor FEDIýNIN
Árıne, búgingi qylqalam ustaǵan táýelsiz urpaq alǵashqy talpynysyn múldem basqasha bastaǵan bolar. Dese de egemen eldiń erkin órenderiniń ónerdegi alǵashqy ustazy Qasteev ekeni sózsiz. Álqıssa.
Kúni keshe ǵana Beıbitshilik jáne kelisim saraıynyń «Qulanshy» zamanaýı óner ortalyǵynda Qazaqstannyń halyq sýretshisi Ábilhan Qasteevtiń 120 jyldyǵyna arnalǵan Qazaq ulttyq óner ýnıversıtetiniń kórkemsýret fakýlteti stýdentteriniń shyǵarmashylyq jumystarynyń kórmesi ótti.
Kórmege iriktelgen, úzdik týyndylar qoıylǵan. Ár shyǵarmadaǵy túrli qoltańba, túrli talǵam, túrli sheberlik birden baıqalady. Jańasha kózqarastary da aıryqsha kórinip tur.
Atalǵan kórmege jas sýretshi Erasyl Orazdyń birneshe týyndysy qoıylypty. Ásirese Shoqan Ýálıhanovty beınelegen sýreti nazardy birden aýdarady.
«Bul sýretti salýǵa eki apta ýaqytymdy jumsadym. Árıne, óz oıyńnan salǵan sýretten bireýdiń sýretin qaǵazǵa túsirý ońaıyraq. Máselen, Ábilhan atamyzdyń Shoqan Ýálıhanovty beınelegen sýretin salý qıynǵa soqpady. Shamam kelgenshe Shoqandy shynaıy keltirýge tyrystym. Árıne, sýret ónerinen habary az adamdarǵa syrttaı bári tamasha kóringenimen úırenerimiz kóp. Gýashpen salynǵan sýret kórermenniń kóńilinen shyqqanyna qýanyshtymyn. Búgin erekshe shabyttanyp turmyn», deıdi sýretshi.
Kórmege kelýshilerdiń ystyq yqylasyna bólengen taǵy bir sýrettiń avtory – Mádına Orazaeva.
Onyń Ábilhan Qasteevti salǵan sýreti janardy alystan baýraıdy.
«Bul sýret maıly boıaýmen salyndy. Týyndyny bir semestr boıy, ıaǵnı jarty jyl saldym. Bul – meniń alǵashqy iri kórmem. Jınalǵandar sýretti joǵary baǵalap jatqanyna qýanyshtymyn», deıdi Mádına.
«Qulanshy» óner ortalyǵynyń jetekshisi Láıla Mahattyń aıtýynsha, jyl saıyn 14 mamyr – Qazaq ulttyq óner ýnıversıteti kórkemsýret fakýlteti stýdentteriniń shyǵarmashylyǵyna arnalady.
«Elimizde talantty balalar kóp. Olar tasada qalmaı, shyǵarmashylyq qabiletin shyńdaýǵa tıis. Ásirese Qazaq ulttyq óner ýnıversıtetine respýblıkanyń túkpir-túkpirinen daryndy stýdentter jınalǵan. Biz óz tarapymyzdan talantty jastardy qoldaýǵa daıynbyz», dedi ol.
Aıta keteıik, kórme barysynda Qazaq ulttyq óner ýnıversıteti stýdentteriniń uıymdastyrýymen sán kórsetilimi ótti.
