Oblystaǵy «Daryn» ortalyǵy jáne Halyq ártisteri aǵaıyndy Abdýllınder atyndaǵy Shyǵys Qazaqstan óner kolledji uıymdastyrǵan dúbirli dodaǵa aımaqtyń ár aýdanynan 11 kúıshi, 6 ansambl qatysty. Shanaqtan kúmbirleı tógilgen qońyr kúı tyńdaǵan jandy tebirentpeı qoımady. Alys-jaqynnan kelgen qazylar da «pah shirkin» dep tańdaı qaǵysyp otyrdy. Kórermender de qıqý qosyp, qoshemet kórsetýmen boldy.
– Shyǵysta qazaqtyń qazaqtyǵyn kórseter úlken baıqaýǵa qazylyq etýge kelip qaldyq. Oqýshylardyń talantyna, talabyna tamsanyp otyrmyz. Túkpirdegi ár aýdanda kórinbeı jatqan, elenbeı júrgen talanttar osyndaı báıgede kórinedi, tanylady. Bolashaqtaryna úlken esik ashylady. Sondyqtan mundaı baıqaý jalǵasyn tabýy kerek. Uıymdastyrýshylarǵa myń alǵys! – deıdi Mádenıet qaıratkeri, kúıshi Murat Ábýǵazy.
Qońyr úndi dombyralaryn arqalap, aımaqtyń ár aýlynan kelgen oqýshylar Altaı-Tarbaǵataıdyń, Batystyń dástúrli kúılerin tókpeletti. Al osyndaı ulttyq naqyshtaǵy baıqaýdyń ótýine muryndyq bolyp, demeýshilik kórsetken kásipker Aıdos Baıǵonysov edi. Qazaqtyń tól murasyn nasıhattaýǵa úlken úlesin qosqan kásipkerge de kópshilik rızashylyq bildirdi.
– Kúıdiń qadirin bilip, qundylyǵyn baǵalaı alyp júrmiz be? Osy suraq alańdatty. Álemdi tańǵaldyrǵan dombyradan tógilgen kúıdi de bıikke kóterýge tıispiz, – deıdi kúı óneriniń janashyry, kásipker Aıdos Jomarthanuly.
Uıymdastyrýshy, ulttyq ónerdiń janashyry, kúıshi Shalqar Yryshannyń aıtýynsha baıqaý eki kezeńnen turdy. Birinshi kezeńdegi úsh kúıdiń ekeýi Altaı, Tarbaǵataı dástúrli kúıshilik mektebinen oryndalsa, úshinshisi shertpe kúıden turdy. Ekinshi kezeńde de qatysýshylar úsh kúı oınady.
– Baıqaý jeńil bolsyn degen nıette ótinim bergenderdiń bárine daıyn nota jiberdik. Sonymen daıyndaldy. Shyǵystyń kúıi keńinen nasıhattalýy buryn bolmaǵan. Demeýshimizdiń arqasynda bul baıqaý kelesi jyly da ótetin bolyp otyr. Bul degen kúıshilerdiń kásibıligin shyńdaýǵa yqpal etedi. Sondaı-aq repertýarlyq qorlary da artty, – deıdi kúıshi Shalqar Yryshan.
Sóıtip, «Kúı darııa, kúı ǵumyr» atty oblystyq kúıshiler baıqaýynda júldeli úshinshi oryndy Halyq ártisteri aǵaıyndy Abdýllınder atyndaǵy Shyǵys Qazaqstan óner kolledjiniń oqýshysy Temirlan Qaıyrbek enshiledi. Ekinshi oryndy Katonqaraǵaı aýdandyq mýzyka mektebiniń oqýshysy Sanjar Qaıyrdınov ıelense, birinshi orynnyń tuǵyrynan Muhamedálı Qaıtbek kórindi. Al qazylar alqasy bas júldeni bir aýyzdan О́skemendegi «Juldyz» óner mektebiniń 8 synyp oqýshysy Oljas Azatbekke tabystady.
– Bul baıqaýdyń erejeleri men úshin qıyn sııaqty kórindi. Biraq ákem úıretip, qoldap, rýhtandyryp qoıdy. Jasyrmaımyn, keıbir kúılerdi notasyz úırengendikten kúrdeli tustaryn alyp shyǵýda qobaljydym. Onyń ústine, báıgege túskender arnaıy mýzyka mektebiniń oqýshylary edi. Meni qoldaǵan aǵaıyn-týystarǵa alǵys aıtamyn, – deıdi bas júldeni qanjyǵaǵa basqan Azatbek Oljas.
Aıta keteıik, júldeli oryn alǵandardyń barlyǵyna arnaıy sertıfıkat pen aqshalaı syılyqtar tabys etildi. Ansambldik oryndaýdan bas júldege Rıdder qalasyndaǵy Balalar mýzyka mektebi qabyrǵasynda qurylǵan «Kerbez» dombyrashylar ansambli ıe boldy. Birinshi oryndy «Shyǵys sazy», ekinshi oryndy «Baldáýren», úshinshi oryndy «Báıge» dombyrashylar ansambli aldy.
Joǵaryda aıtyp ótkendeı, bul baıqaý kelesi jyly da jalǵasyn tabady.
О́skemen
