Atyraý oblysynyń jedel shtabynyń málimetinshe, Qulsarydan Atyraý, Aqtaý qalalary men «Teńiz» kenishindegi evakýasııa pýnktterine 36 738 turǵyn kóshirildi. Turǵyndardyń deni oralǵanymen, áli de 809 adam evakýasııalyq pýnktterde turyp jatyr. Onyń ishinde 371 adam «Teńiz» vahtalyq qalashyǵyndaǵy evakýasııalyq pýnktte ornalasqan. Kórshiles Aqtaý qalasyndaǵy evakýasııalyq pýnktterge ornalasqan 86 turǵyn turǵylyqty mekenine áli oralmaǵan. Al Qulsary qalasynda ashylǵan evakýasııa pýnktterinde 352 adam turyp jatyr.
Qulsarydaǵy tasqynǵa baılanysty kúrdeli jaıt el azamattarynyń bárin alańdatyp otyr. Ár óńirden kómek qolyn sozyp jatqandar bar. Keshe Atyraýǵa Almaty qalasy men Almaty oblysynan jiberilgen gýmanıtarlyq kómek jetkizildi. Gýmanıtarlyq kómek Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń bastamasymen jınalǵan.
Naqtylaı aıtqanda, qarajat pen qajetti zattardyń jınalýyna Almaty qalasy jáne Almaty oblysy ákimderiniń janyndaǵy Áıelder isteri jáne otbasylyq-demografııalyq saıasat jónindegi komıssııalardyń músheleri bastamashy bolǵan. Oǵan qalalyq jáne oblystyq Jastar saıasaty basqarmalarynyń qyzmetkerleri atsalysqan.
«El azamattary Atyraý oblysyndaǵy jaǵdaıdy janashyrlyqpen baqylap otyr. Halyqaralyq Otbasy kúnine oraı jiberilgen gýmanıtarlyq kómekte birinshi kezekte qoldanylatyn tósek-oryn jabdyqtary, azyq-túlik, medısınalyq preparattar men jańa kıimder bar», dedi Atyraý oblysy ákiminiń janyndaǵy Áıelder isteri jáne otbasylyq-demografııalyq saıasat jónindegi komıssııanyń bas ınspektory Zámzagúl Jalmýrzına.
Onyń aıtýynsha, óńirlik komıssııa músheleri men áskerıler gýmanıtarlyq kómekti suryptaıdy. Máselen, matras, tósek-oryn jıyntyǵy, kópshik, jamylǵy kórpe, súlgi, gıgıenalyq zattar, azyq-túlik, jańa kıim, sharýashylyq jáne qurylysqa qajetti buıymdar Qulsary qalasyna jetkiziledi.
Atyraý oblysy
