Sýretti túsirgen – avtor
Oblys ortalyǵyn jaryqtandyrý jobasyn bastaǵandaǵy maqsat eskirgen 16 myń shamdy jaryq dıodty elektr únemdegish túrine aýystyryp, jaryq aǵynyn birqalypty retteýge qol jetkizý edi. Bul úshin kóshe shamdaryn avtomatty basqaratyn biryńǵaı dıspetcherlik ortalyq iske qosylǵan. Qolǵa alynǵan jumystar tolyq aıaqtalǵanda elektr qýatyn 60%-ǵa deıin únemdelýi múmkin eken.
Kósheni jaryqtandyrý júıelerin jańǵyrtý jónindegi jumys tobynyń jetekshisi Rınat Butajanovtyń sózine sensek, 11 583 kóshe shamy jańartylǵan, 214 basqarý shkafy men 212 km elektr jelisi aýystyrylǵan. Alaıda ornatylǵan jaryq shamdar az ýaqyt ishinde kúıip ketip otyrǵan. Keıbireýleri múldem janbaı qalǵan. Jalpy, qalada shamamen 2 myńǵa jýyq jaryq shamy isten shyqsa, sonyń 1 400-i – jelilik, 600-i ár jerde ornalasqan.
– Shamdardyń isten shyǵýdaǵy negizgi sebebi – kósheni jaryqtandyrý júıesiniń tozýy, tutynýshylar sanynyń ósýi, qolaısyz aýa raıy. Baıqasaq, qalada qatty jańbyr jaýsa nemese daýyl soqsa, keıbir shaǵyn aýdandarda jaryq sónip qalady. Sol sııaqty jańǵyrtý kezinde qurylys-montajdaý jumystarynyń sapasyzdyǵy da bar. Eskerte keteıik, joba áli aıaqtalǵan joq. Eger «Everlight Electronics Co» kompanııasy óz mindetterin oryndasa, olqylyqtar qalpyna keltiriledi. Qazir qosalqy merdiger «Digital Security» kompanııasy qalpyna keltirý jumystaryn qarqyndy júrgizip jatyr. О́skemen kósheleriniń jaryq shamdaryn jańǵyrtý jobasyn jyl sońyna deıin aıaqtaýdy josparlap otyrmyz, – dedi R.Butajanov.
Qazirgi ýaqytta О́skemendegi birneshe kósheniń jaryq shamdary qalpyna keltirilgen. Qolǵa alynǵan jumys maýsymnyń ortasyna deıin tolyq aıaqtalady. «Digital Security» JShS basshysy Danııar Áýespaevtyń aıtýynsha, búginge deıin О́skemende 461 sham jańartylǵan.
– Qalanyń ortalyq kósheleri men jeke sektordaǵy 461 jaryq sham aýystyryldy. Kompanııa mamandary turǵyndardyń ótinimi boıynsha kóshelerdi jaryqtandyrý júıesin táýlik boıy baqylaýda ustap, qyzmet kórsetedi. Sondaı-aq bıiktegi jáne jer astyndaǵy elektr jelilerin qalpyna keltirýmen de aınalysady. Osyǵan deıin 5 shaqyrym oqshaýlanǵan elektr jelisi aýystyrylyp, 8 basqarý shkafynyń jumysy retteldi, – dedi D.Áýespaev.
Qazirgi tańda eskirgen basqarý shkaftaryn qaıta bólshekteý, kóshelerdi jaryqtandyrý jelisine qosylǵan bógde kózderdi ajyratý máseleleri qarastyrylyp jatyr. Elektr jelisin qalpyna keltirý jáne jóndeý jumystary nazardan tys qalǵan joq. Joba aıasyndaǵy jalpy jumystar jyl sońyna deıin tolyq aıaqtalady. Jospar oıdaǵydaı bolsa, jyl sońynda О́skemen qalasy samaladaı jarqyrap turary sózsiz.
О́skemen
