Keremet soprano ánshiler – Qazaqstannyń eńbek sińirgen qaıratkeri Bıbigúl Januzaq pen «Qurmet» ordeniniń kavaleri Aızada Qaponova, qýatty ári jarqyn messo-soprano daýysynyń ıesi Saltanat Muratbekova, sondaı-aq daryndy tenor Erulan Kámel men barıton Azat Málik tyńdarmandarǵa jan tebirenterlik emosııalarǵa toly keremet keshti tartý etti.
Túrli mýzykalyq mádenı dástúrlerge tıesili operalardan arııalar men kórinisterdiń áýeni konsertmeıster Janar Ahmetovanyń súıemeldeýinde kórermenderdiń júregine jetti. Qazaqstandyq týyndylardan bastap batys eýropalyq kompozısııalarǵa deıin árbir arııa shaǵyn spektakl tárizdi bolyp, tyńdarmandardyń kóz aldynda qushtarlyq, tragedııa men mahabbat álemin jandandyrdy.
«Biz konsert baǵdarlamasyna teatrymyzdyń repertýarynda joq qazaq operalarynan arııalardy qostyq. Olardyń qatarynda Nurǵısa Tilendıevtiń «Altyn taýlar», Sydyq Muhamedjanovtyń «Aısulý» shyǵarmalary bar. Sondaı-aq basqa da opera jaýharlary shyrqaldy. Máselen, Aızada Qaponova M.Glınkanyń álemdik mýzykalyq bestsellerge aınalǵan «Rýslan men Lıýdmıla» operasynan Lıýdmılanyń kavatınasyn usyndy. Ony oryndaý úshin án aıtýdyń joǵary tehnıkasy bolýy qajet. Menińshe, Aızada Qaponovaǵa ertegi álemi keıipkeriniń beınesi óte jarasady. Bıbigúl Januzaq Dj.Pýchchınıdiń «Djannı Skıkkı» operasynan Laýrettanyń arııasyn sheber jetkize bildi. Bul – óte áserli arııa, jasaýy bolmaǵandyqtan, ol qosyla almaǵan súıiktisi Rınýchchoǵa degen mahabbaty týraly ákesine ándetip syr ashady, – dedi Janar Ahmetova.
«Áıgili opera arııalary» keshi mýzykalyq óner kórsetý ǵana emes, sondaı-aq rekvızıtter men akterlik oıyn qoldanylyp, sońy tyńdarmandarmen syrlasýǵa ulasqan naǵyz teatrlyq qoıylym boldy desek, artyq aıtqanymyz emes. О́nersúıer qaýym operalyq sahna atmosferasyna enip, keıipkerlerdiń emosııalaryn sezindi jáne olardyń taǵdyryn bastan ótkergendeı kúı keshti.
Mazmundy mýzyka keshi asqaq klassıka álemine boılaýǵa jáne kásibı oryndaýshylardyń qaıtalanbas sheberlikterinen lázzat alýǵa daıyn jandar úshin tamasha tartý bolǵany sózsiz.
