Foto: azh.kz
Atyraý oblysynyń ákimi Serik Shápkenov Qulsarydaǵy sý tasqynynan zardap shekken turǵyndarmen kezdesti. Ol turǵyndardyń usynys-talabyn tyńdap, sý tasqynynan zardap shekkenderge keltirilgen zalaldy óteý tártibin túsindirdi.
Ákimniń aıtýynsha, úıi apatty dep tanylǵan turǵyndarǵa ótemaqy naryqtaǵy qunyna sáıkes tólenedi. Alaıda sý tasqyny kezinde zardap shekken Qulsary qalasynyń turǵyndary aqshalaı ótemaqyny nysanaly maqsatqa – jańa turǵyn úı satyp alýǵa, turǵyn úı salýǵa nemese jóndeý-qalpyna keltirý jumystaryna jumsaýǵa tıis. Turǵyndardyń nysanaly esepshotyna búlingen úıdiń ár sharshy metri úshin 200 000-240 000 teńgeden qarjy aýdarylady.
«Qazir birinshi kezekte sý tasqynynan zardap shekken turǵyndar baǵalaý jáne múlikti tehnıkalyq saraptaý qorytyndylarymen tanysyp, aqshalaı qarajatty tóleýge kelisimin berýge tıis. Tólem eki apta ishinde júrgiziledi», dedi S.Shápkenov.
Atyraý oblysynyń jedel shtabynyń málimetinshe, 15 mamyrda Qulsary qalasynda jyljymaıtyn múlikti baǵalaý jáne tehnıkalyq saraptaý qorytyndylaryn jarııalaý boıynsha mobıldi toptardyń jumysy bastaldy. Jylyoı aýdanynyń 100-den asa turǵyny baǵalaý paraǵyn alyp otyr. Endi olar eki kún ishinde aqshalaı ótemaqyǵa ótinish bere alady. Sý tasqynynan búlingen barlyq úıdi baǵalaý jumysyn 10 kúnde aıaqtaý josparlanyp otyr.
«Jylyoı aýdanynda 3 613 otbasyna 100 aılyq eseptik kórsetkish mólsherinde birjolǵy tólem berildi. Tólengen qarjynyń jalpy somasy – 1 mlrd 387 mln teńge. Keltirilgen materıaldyq zalalǵa ótemaqy tóleý úshin qujattar daıyndalady. Jyljymaıtyn múlikke tehnıkalyq tekserý jáne baǵalaý júrgizilip jatyr. Qazir turǵyndardan 2 950 ótinish qabyldandy. Onyń ishinde 2 697 ótinish qaraýǵa jiberildi», dep habarlady oblystyq jedel shtabtan.
Aýdan ákimi Jumabek Qarajanovtyń aıtýynsha, Qulsary qalasy aýyzsýmen tolyq qamtamasyz etilgen. Elektr qýatyna 2 870 úı qosyldy. Tasqyn sý basqan aýmaqtarda ornalasqan 3 084 úı tabıǵı gazben jabdyqtaldy. Endi sý tasqynynan zardap shekken úılerdiń ıeleri sáýir, mamyr, maýsym aılarynda kommýnaldyq qyzmetter úshin tólemnen bosatylady.
«Turǵyndarǵa naýryz aıyna qatty turmystyq qaldyq, elektr energııasy, gaz jáne aýyzsýǵa kommýnaldyq tólemderin tóleýge túbirtekter taratylady. Alaıda qala turǵyndary tólemdi ózderine yńǵaıly kez kelgen ýaqytta óteı alady», dedi J.Qarajanov.
Onyń aıtýyna qaraǵanda, Qulsary qalasynda kommýnaldyq qyzmetterge tarıf kóterilgen joq. Osy kezge deıin tarıfterdi kóterý deregi tirkelmedi.
Jylyoı aýdandyq bilim bólimi basshysynyń mindetin atqarýshy Gúljansara Qalıqyzynyń aıtýynsha, Oqý-aǵartý mınıstrligi mektep jasyndaǵy balalardyń «Baldáýren» oqý-saýyqtyrý lagerinde demalýyna qoldaý kórsetken. Qazir Qulsarynyń 146 oqýshysy demalys lagerine jiberildi. Olar 20 kún demalady. Oqýshylar Túrkistan, Balqash, Shýchınsk qalalarynda jáne Býrabaıda ári demalyp, ári oqýyn jalǵastyryp júr. Maýsym aıynda taǵy 35 oqýshyny atalǵan demalys ornyna jiberý josparlanyp otyr. Sý tasqynynan zardap shekken jáne evakýasııalanǵan otbasylardyń balalaryn oqý-saýyqtyrý, demalý lagerine jiberý jalǵasyn tabady.
Atyraý oblysy
