Kezdesýge bank, ınvestısııalyq, óndiristik, ónerkásiptik jáne qurylys kompanııalary men jetekshi saýda jelileriniń ókilderi qatysty. Otandyq ınvestorlar ýnıversıtet ǵalymdarynyń qurylys jáne qurylys materıaldaryn óndirý salasyndaǵy ǵylymı jetistikterimen, ınnovasııalyq jobalarymen tanysty.
Eýrazııa ýnıversıtetiniń basqarma tóraǵasy – rektory Erlan Sydyqovtyń aıtýynsha, ENU INVEST MEETUP jobasy ǵalymdardyń ónertabysyn tanystyrýmen qatar ınvestorlarmen uzaqmerzimdi baılanys ornatýǵa, jańa jobalardy úılestirýge jol ashady.
«Biz búgin ınvestorlarǵa ǵalymdarymyzdyń biregeı ázirlemelerin paıdalanýǵa múmkindik berdik. Búginde bıznestiń jańa tehnologııalyq sheshimderdi ázirleýge jáne engizýge qyzyǵýshylyǵy artyp keledi. Bul baǵytta ýnıversıtet kompanııalarmen seriktestikti keńeıtti. Bizdiń ǵalymdar olardyń suranysy boıynsha zertteýler júrgizedi. Prezıdent tapsyrmasy boıynsha memlekettik-jekemenshik áriptestik tetikteri quryldy. Investorlar stýdentter úıiniń qurylysyna da qyzyǵýshylyq tanytyp otyr. Osynyń esesine ýnıversıtet keler jyly stýdentterdiń jataqhanaǵa qajettiligin tolyq jabady dep otyrmyz», dedi E. Sydyqov kezdesý barysynda.
Osy kúni ýnıversıtet basshylyǵy ınvestorlarmen quny 20 mlrd teńge bolatyn 4 kelisimshartqa qol qoıǵan. Mysaly, kelisim boıynsha eldegi eki kompanııa 3 myń oryndyq stýdentter úıin salýǵa qarjy aýdaratyn boldy. Budan bólek taǵy eki kompanııa ýnıversıtet stýdentterine jataqhana salýǵa qyzyǵýshylyq tanytqan.
Basshylyq stýdentterge arnalǵan medısınalyq ortalyǵy bar áleýmettik-mádenı keshen salý boıynsha «Astana clinic» kompanııasymen kelisim jasady. Kóp uzamaı salynyp, paıdalanýǵa beriletin emhanada stýdentter medısınalyq qyzmetterdi tegin alady eken. Basqosýda ENU LAB ǵylymı-óndiristik ortalyǵynyń ǵalymdary kópqabatty úılerdegi dybysty oqshaýlaý máselesin sheshýge múmkindik beretin ınnovasııalyq tehnologııalaryn tanystyrdy. Ýnıversıtettiń ınnovasııalardy damytý departamentiniń dırektory Ásel Jeksembaeva asfaltbetonnyń sapasyn arttyrýǵa septesetin tehnologııa týrasynda baıandasa, Aqparattyq tehnologııalar fakýltetiniń dosenti Maqpal Jartybaeva sý qoımalarynyń tasqynǵa deıingi jáne tasqynynan keıingi kezeńderin baqylaýǵa arnalǵan biregeı robototehnıkalyq keshenin tanystyrdy.
Ýnıversıtettiń Aqparattyq tehnologııalar fakýlteti kafedrasynyń aǵa oqytýshysy Nurzada Amangeldi bıznes ókilderine jańa zııatkerlik júıeni usyndy. Bul tehnologııanyń artyqshylyǵy – óndiristik kásiporyndarda naqty ýaqyt rejiminde monıtorıng júrgizýge, qyzmetkerlerdiń qaýipsizdik normalaryn baǵalaýǵa sondaı-aq kez kelgen buzýshylyqtar týraly der-kezinde eskertýge múmkindik beredi.
