Talǵar aýdandyq Mádenıet úıinde aımaqtyq tehnıkalyq jáne kásiptik bilim beretin oqý oryndarynyń stýdentteri arasynda ótken bul baıqaýǵa óńirdegi 23 kolledjden 84 bilim alýshy qatysyp, 12 atalym boıynsha baq synasty.
«Bul jarys kásiptik bilim alýshy stýdentterdiń kásibı sheberligi men shyǵarmashylyq izdenisterin jan-jaqty kórsetti. «WorldSkills Qonaev – 2024» – jumysshy mamandyqtarynyń olımpıadasy deý oryndy. О́ıtkeni ol, stýdentterge alǵan bilimin kádege jaratýmen qatar, sheberlikterin shyńdaýǵa, qatelikterin túzeýge, kásibıligin arttyrýǵa baǵyt-baǵdar beredi. Baıqaýǵa qatysýshy stýdentterdiń barlyǵy talantty, óz kásibin qadirleıtini kórinip tur. Osy jarysta top jarǵan jeńimpazdar bilimderi men kásibı sheberlikterin respýblıkalyq chempıonatta dáleldeıtin bolady. О́zderińizge belgili, ulttyq chempıonattyń bir tapsyrmasy aǵylshyn tilinde usynylady, sol sebepti jeńimpaz stýdentterimiz aǵylshyn tilin úırenýmen qatar, praktıkalyq daıyndyǵyn kásiporyn bazasynda jetildirýdiń múmkindigin qarastyrý mańyzdy», dedi oblystyq bilim basqarmasynyń basshysy S. Bespaeva.
Úsh kúndik chempıonatta «Aspaz isi» boıynsha Almaty oblysynyń qyzmet kórsetý jáne tamaqtandyrý salasyndaǵy ınnovasııalyq tehnologııalar kolledjiniń stýdenti Nursultan Tolybek jeńimpaz atansa, «Shashtaraz óneri» men «Sán tehnologııasy» atalymdarynda da osy kolledjdiń stýdentteri Ánel Imanqoja men Almıra Karımova top jardy. «Grafıkalyq dızaın» boıynsha Almaty ekonomıkalyq kolledjiniń stýdenti Aısultan Berdeshov 1-oryn ıegeri atansa, «Veb tehnologııalar» jáne «Elektromontajdaý jumystary» atalymynda Talǵar polıtehnıkalyq kolledjiniń stýdentteri Taırjan Ahmetov pen Anatolıı Konchakov jeńimpazdar qatarynan kórindi.
О́z mamandyqtaryn qorǵaý boıynsha biliktilik tanytqan bilim mekemeleri barynsha belsendi boldy. «Tómengi synyptardy oqytý» boıynsha Esik gýmanıtarlyq-ekonomıkalyq kolledjiniń stýdenti Sofııa Vıýn úzdik atansa, «Shanaq jumystary» boıynsha Qarakemer kásiptik kolledjinde bilim alýshy Qýandyq Orazymbetov ortasynan ozdy. Sondaı-aq «Jeńil avtomobılderdi jóndeý jáne qyzmet kórsetý» saıysynda Talǵar agrobıznes jáne menedjment kolledjiniń stýdenti Ádilet Ádebıetuly joǵary ball jınap, jeńimpaz atandy.
«Dánekerleý tehnologııasy» boıynsha Kásiptik oqýdaǵy kópsalaly kolledjinde bilim alatyn Ilııas Járimbetov 1-oryndy ıelense, «Mektepke deıingi tárbıe jáne daıyndyq» atalymynda Esik gýmanıtarlyq-ekonomıkalyq kolledjiniń túlegi Eńlik Álnur, al «Jelilik jáne júıelik ákimshilendirý» boıynsha Talǵar polıtehnıkalyq kolledjiniń stýdenti Sabyrjan Ámirov úzdikter qatarynan kórindi.
Jeńimpazdardy oblystyq máslıhat depýtaty Serikhan Ádilhanov quttyqtap, stýdentterdiń kásiptik sheberligi jyldan jylǵa arta túskendigin atap aıtty.
«Men «ELECTUDE» baǵdarlamasy boıynsha «Prıora» avtokóliginiń qozǵaltqyshyn jáne VAZ-2107 kóliginiń berilis qorapshasyn buzyp-jınaý boıynsha baǵymdy synadym. Qozǵaltqyshty buzyp-jınaýǵa 3 saǵat, berilis qorapshasyna 1,5 saǵat ýaqyt berildi. Oǵan qosa, aınalańdy taza ustaý da nazarǵa alyndy. Sondaı-aq aqaýdy anyqtaýda da tapqyrlyq tanytýym kerek boldy. Osynyń bári eskerile kelip, 100-den 90,8 ball jınap, jeńimpaz atandym. Meniń bul mamandyqqa kelýime ákemniń 40 jyldan beri kólik júrgizetini jáne aǵamnyń da mashına jasaýmen aınalysatyny aıryqsha áser etti. Aldaǵy respýblıkalyq chempıonatta jeńis tuǵyrynan kórinýge kúsh salamyn», degen «Jeńil avtomobılderdi jóndeý jáne qyzmet kórsetý» saıysynyń jeńimpazy Ádilet Ádebıetuly keleshekte Qazaq kólik qatynastary ýnıversıtetine oqýǵa túsip, joǵary bilim alýdy, myqty maman bolýdy armandaıdy.
Almaty oblysy
