Sol kúnderi kún raıy da azdap jyly bolǵan. Aǵaıyndy eki jigit qannen-qapersiz úıdiń tóbesinde dem alyp, jata bergen. Sol kúni 3 myńdaı adam kúndiz-túni jumys istep, irgesin bekitip, ústin bıiktetken dambany tasqyn sý jaryp ketip, qalaǵa aǵyldy. Úıine sup-sýyq, muzdy sýdyń kóterilip kele jatqanynan shoshyp oıanǵan eki jigittiń biri jan daýsy shyǵyp aıǵaı salady. Sol kezde rezeńke qaıyqpen júrgen qutqarýshylar ony ózderine mingizip alyp, ajaldan qutqarady. Aǵasynyń da osynda bolǵanyn aıtqanymen, ekinshisi tabylmaıdy. Ol, bálkı, oıanǵan bette sýǵa qulap, tunshyǵyp qalǵan bolýy kerek. Qutqarylǵan jigittiń aıtýyna qaraǵanda, olar sý áli kele qoımaıdy dep oılap, demalyp almaq bolǵan eken. Sol kezde osy mańdaǵy sýdyń bıiktigi 1,5-2 metrge deıin kóterilip, úıdiń shatyryna jetken.
Joǵalǵan jigittiń máıiti tek 13 mamyr kúni, sý qaıtqan soń ǵana tabylyp otyr. Polısııa onyń ajalyna syrttan qandaı da bir kúshtiń áser etpegenin aıtady. Degenmen máıit qazir sot-medısınalyq saraptamaǵa jiberilgen.
Qazir qalanyń kásiporyn-mekemeleriniń bári senbilikter ótkizip, sýdan qurǵaǵan shaǵyn aýdandardaǵy qalyń qoqystardy tazalap jatyr. Munda sý buzǵan shaǵyn úılermen qatar tasqyn aǵyzyp ákelgen neshe túrli qoqystar shyǵyp jatyr. Oıqala shaǵyn aýdanynda PD ákimshilik polısııa basqarmasynyń qyzmetkerleri demalys kúni jalǵyz turatyn zeınetkerdiń ýchaskesinde shaǵyn senbilik ótkizdi.
«Polısııa qyzmetkerlerine rııasyz kómek kórsetkeni úshin alǵysymdy bildirgim keledi, pogon taqqan adamdar bos ýaqytynda kelip, búlingen jıhazdy shyǵarýǵa kómektesti, qoqysty bólshektedi, aýmaqty tazalady. Sizderge rahmet!» dedi zeınetker.
Sondaı-aq uzaq ýaqyt boıy aralǵa aınalǵan Prıbrejnoe aýylynyń turǵyndarynyń biri qaıtarylǵan mal úshin ýchaskelik ınspektorǵa shyn júrekten alǵys aıtty. Sýdyń tez kelýine baılanysty er adam baspanadan asyǵys túrde ketýge májbúr bolyp, qoradaǵy bordaqyǵa qoıǵan qoshqarlaryn qutqarýǵa ýaqyt bolmapty. Májbúrli evakýasııadan bir aı ótken soń ǵana aýyl turǵyny ýchaskelik ınspektor Qaıyrtaı Nurǵalıevtiń kómegimen evakýasııalanǵan maldar arasynan óz qoılaryn tapty.
«Kóptegen adamdar maldaryn tastap ketýge májbúr boldy. Olardy aman saqtap qalý basty mindetterimizdiń biri boldy. Jumys uıymdasqan túrde júrgizildi, úlken sýmen arpalys kezinde aýylda qalǵan jergilikti turǵyndar da bizge belsendi túrde kómek kórsetti. Bárimizdiń kúsh-jigerimizben mal urlyǵyna jol bermedik, quqyqtyq tártip tıisti deńgeıde qamtamasyz etildi», deıdi polısııa aǵa leıtenanty Q.Nurǵalıev.
Al oblys ákimi Ǵaýez Nurmuhambetov Qyzyljar aýdanyndaǵy sý tasqynynan zardap shekken aýyldardyń bárin aralap shyqty. О́ńir basshysy Bogolıýbovo, Prıbrejnoe, Nadejka, Teplıchnoe, Sokolovka aýyldarynyń turǵyndarymen kezdesti. Aýyldyqtarǵa úıdi jóndeý, satyp alý boıynsha erejelerdi túsindirdi. Qyzyljar aýdanynda 1,5 myń úıdi sý basty, búginge deıin 500-ge jýyq úı tekserildi. Turǵyn úılerdiń paıdalanýǵa jaramdylyǵyn anyqtaý úshin tehnıkalyq zertteý júrgizilip jatyr. Úılerdi qalpyna keltirý, jóndeý jumystarymen Qyzyljar, Aqqaıyń aýdandarynyń mehanıkalandyrylǵan jasaqtary aınalysyp júr. Keıbir baspanalardy úı ıeleri ózderi de jóndeı alady. Bul úshin memleket úı ıesiniń shotyna aqsha aýdarady, somasy baǵalaý komıssııasynyń sheshimine baılanysty bolady.
Soltústik Qazaqstan oblysy
