Álemdik deńgeıdegi mádenı shara Shyǵys jáne túrki dúnıesi birtýar tulǵasynyń 300 jyldyq torqaly toıyna arnalǵan. Alqaly ǵylymı jıynǵa Qazaqstan atynan Mádenıet jáne aqparat mınıstri Aıda Balaeva, sondaı-aq bir top tanymal ǵalym qatysady. Eki el arasyndaǵy ózara áriptestik aıasynda ótetin sharalar Qazaqstan-Túrikmenstan baýyrlastyq qarym-qatynasynyń jańa kezeńin aıqyndamaq. О́zderińizge málim, Túrikmenstan Prezıdenti Serdar Berdimuhamedovtiń elimizge kelgen arnaıy sapary men Qazaqstan Prezıdenti Qasym-Jomart Toqaevtyń Ashhabatqa arnaıy saparynda, sondaı-aq osy shaharda ótken Kaspıı sammıtinde ǵasyrlar boıy qalyptasqan dostyq ári tatý kórshilik qarym-qatynasty arttyrýǵa qatysty eleýli is-josparlar belgilengen bolatyn. Sol basqosýlarda ekijaqty strategııalyq áriptestikti odan ári nyǵaıtý, qazirgi jaýapty kezeń men damý úrdisteri aıasynda Ortalyq Azııada jáne halyqaralyq arenada memleketaralyq yntymaqtastyqtyń naqty baǵdarlaryn aıqyndaý, Qazaqstan-Túrikmenstan saıası suhbattastyǵyn, saýda-ekonomıkalyq seriktestigin keshendi óristetý eki memlekettiń uzaqmerzimdi múddesine negizdeletini aıtylǵan edi. Álemdik deńgeıdegi tulǵa Maqtymqulynyń úsh ǵasyrlyq mereıtoıy – osy baılanystyń mádenı-ǵylymı baǵdaryn aıqyndaıdy. Shara aıasynda «Qazaq gazetteri» seriktestigine kiretin «Egemen Qazaqstan» gazeti men «Türkmenistan» gazeti, qos eldiń balalar basylymy arasynda yntymaqtastyq máseleler, ortaq aqparattyq jobalar talqylanbaq.
