Foto: Ultsport.kz. Tazhkuranov M.
«Ulttyq quryltaıda Prezıdent Qazaqstan Uly dala kóshpeli órkenıetiniń tikeleı murageri sanalatynyn jáne biz ózimizdiń mádenı muramyzdy qorǵap, ilgeriletýimiz kerek ekenin atap ótti. «Uly dala joryǵy» báıgesi «AMANAT» partııasynyń qoldaýymen úshinshi jyl qatarynan ótkeli otyr. Marafon-báıge otandastarymyzdy biriktiretin, ulttyq rýhty nyǵaıtatyn jobaǵa aınaldy», dedi AMANAT»-tyń Atqarýshy hatshysy Dáýlet Káribek.
Osy jylǵy 500 shaqyrymdyq marafon-báıge Pavlodar – Astana baǵyty boıynsha ótedi. Oǵan elimizdiń ár óńirinen 19 komanda qatysyp jatyr.
«Uly dala joryǵy» marafon-báıgesin úshinshi ret ótkizip otyrmyz. Bul – azamattar men arǵymaqtardyń tózimi men erik-jigeri synǵa túsetin doda. Barlyq sportshylarymyz osy kúrdeli synaqtan súrinbeı ótip, jorytqanda joldary bolsyn!», dedi Ulttyq sport qaýymdastyǵynyń prezıdenti Islambek Saljanov.
Komandalar bes kún boıy kúnine 100 shaqyrym jol júrip ótýi tıis. Ár 50 shaqyrym saıyn komandalarǵa demalýǵa múmkindik beriledi. Attardy tájirıbeli veterınarlar baqylaıdy. Aıta keteıik, ár komandanyń jolǵa shyǵý ýaqyty ártúrli. Birinshi komanda saǵat 07.00-de, kelesisi eki mınýt aralyqtan soń jolǵa shyǵady. Nátıjesinde sońǵy komandanyń sapary 07.36-da bastalady. Komandalar qandaı nómir taǵatyny jerebe tartý barysynda anyqtaldy.
Qozǵalys ýaqyty ártúrli bolǵandyqtan komandalar bir-birimen jaryspaıdy. Barlyq qashyqtyqty eń qysqa ýaqytta eńsergen komanda jeńimpaz atanady.
Eske salaıyq, «JORYQ» respýblıkalyq federasııasy Qazaqstan Respýblıkasy Ulttyq sport qaýymdastyǵynyń quramyna kiredi. Qaýymdastyq quramynda budan ózge báıge, kókpar, aýdaryspaq, asyq atý, sadaq atý, jamby atý, teńge ilý, qusbegilik jáne taǵy basqa federasııalar bar. Ulttyq sport qaýymdastyǵyn belgili kásipker, mesenat, «Altyn Qyran Foundation» qoǵamdyq qory Qamqorshylyq keńesiniń tóraǵasy Islambek Saljanov basqarady.
