Lada.kz jazǵandaı, jelide 18-inen 19 mamyrǵa qaraǵan túni bolǵan apattyń saldary beınelengen kadrlar paıda boldy.
Kýágerlerdiń aıtýynsha, Toyota Land Cruiser Prado júrgizýshisi 20-shy shaǵynaýdannan kele jatyp, qarsy jolaqtaǵy kólikpen soqtyǵysqan. Keıin jol apatyna sebep bolǵan júrgizýshi kóligin júrgizip kete bergen.
Araǵa kóp ýaqyt salmaı ol 12-shi shaǵynaýdandaǵy "Jas qanat" sport kesheniniń mańynda Kia kóligine soqtyǵysqan. Bul kólikte balalary bar otbasy otyrǵan. Jol talǵamaıtyn kólik ıesiniń mas bolǵany aıtylady.
Oblystyq polısııa departamenti oqıǵa kezinde Toyota Land Cruiser Prado júrgizýshisi mas bolǵanyn rastady. Ol ákimshilik jaýapkershilikke tartyldy. Kólik aıypturaqqa qoıyldy.
Mańǵystaý oblystyq jedel medısınalyq járdem stansııasy dárigerlerge qońyraý 23:05-te túskenin habarlady. Bir adam zardap shekti, biraq ol aýrýhanaǵa jatqyzýdan bas tartty.
