Buǵan deıin aıtqanymyzdaı, Solnechnyı-2 shaǵyn aýdanynda 500 úıdiń qurylysy bastalyp ketti. Alǵashqy 100 úıdiń ishki jumystary ǵana qaldy dep aıtýǵa bolady. Mamyrdyń 21-ine deıin 6 myń otbasy bir rettik 100 AEK kólemindegi ótemaqyny aldy. Buǵan 2,2 mlrd teńge qarajat jumsaldy.
Keıbir shydamsyz turǵyndar qolyna saraptama qujattary nege berilmeı jatyr dep mazasyzdanyp otyr. Bul suraqtarǵa Petropavl qalasynyń ákimi Serik Muhamedıev: «Qujattardy berýdi keshiktirip jatqan sebebimiz mamandardyń kesirinen bolyp tur. Biz olarǵa aldymen úılerdi saraptap shyǵyńyzdar, qujattardy sosyn toltyrasyzdar degen tapsyrma bergen edik. Sony oryndamaq bolǵan mamandar aktilerdi jasaýǵa endi ǵana kirisip jatyr. Mamyrdyń 23-ine deıin barlyǵyńyzǵa qujattardy tapsyramyz», dep óziniń Instagram-daǵy paraqshasynda jaýap berdi.
Sý astynda qalǵan shaǵyn aýdandardyń biri – Zarechnyı kenti. Bul negizinen bas erkinen aıyrylǵan qamaýdaǵy jandardyń erler men áıelder zonalaryna arnalǵan kent edi. Tasqyn sý kezinde qamaýdaǵy jandar da tolyq evakýasııalanǵan. Mundaǵy turǵyndardyń kóbi – osy orynda kúzetshi, baqylaýshy, tárbıeshi qyzmetindegi adamdar. Olardyń birazy baraqtarda turatyn. Zarechnyı-2-degi sondaı baraqtyń biri 1962 jyly salynǵan eken. Ábden tozyǵy jetken osy úıdiń turǵyndary qazir jaqsy úılerge qolymyz jetip qalar ma eken dep alań kóńilde júr.
«Bizdiń úıdi saraptaýshylar súrý kerek degen sheshim qabyldar degen úmittemiz. О́zi de ábden eskirip, qabyrǵalary shirip, kógere bastaǵan edi. Qazir qalada páter jaldap turyp jatyrmyz. Máselemiz tezirek sheshiler degen oıdamyz», deıdi turǵyn Juldyz Sápıeva.
Qazir munda mehbrıgadalar jumys istep, qoqystan tazartý, syrtqa shyǵarý jumystarymen aınalysyp jatyr. О́zderi oblystyń Mamlıýt aýdanynan jasaqtalǵan 5 brıgadadan turatyn 35 jigit eken. Qaramaǵyndaǵy 8 tehnıkamen áli de keppegen, turyp qalǵan qaq sýlardy soryp jatyr.
«Árbir bortty esepteıtin bolsaq, búginge deıin 110 tonnanyń qoqysyn shyǵardyq. Biraq áli de bitetin emes. Bizge 79 úıdi tazalaý tapsyrylǵan, solardyń 78-iniń mańyn tazarttyq. Bireýi áli sýda tur. Mańaıy tazartylǵan úılerdi saraptaý aıaqtalýǵa jaqyn. Tek 5 úı qaldy», deıdi Mamlıýt aýdany ákiminiń orynbasary Temirlan Mamasharıpov.
Qala ákimi úıin sý basqan turǵyndarǵa tikeleı efır arqyly shyǵyp ta kóptegen suraqqa jaýap berdi. Sonyń ishinde úıdi qalpyna keltirýge ketetin shyǵyndardy anyqtaıtyn smeta qalaı jasalatyny suraldy.
«Bul úshin aqaýlyq akt jasalady, onda demontaj jáne montajdaý jumystary kórsetiledi. Biraq biz keremet parket tósep beredi dep oılamańyzdar. Shyǵyn smetasynyń kólemi ártúrli. Búginge deıin 50 úıdiń turǵyndary jóndeý jumystaryn jasatýǵa kelisti. Olardyń shyǵyndary 3 mln-nan 14 mln teńge aralyǵynda belgilendi. Mundaı aıyrmashylyq buzylǵan úılerdiń qandaı materıaldardan turǵyzylǵanyna, qurylys sapasyna baılanysty», dedi S.Muhamedıev.
Jıi qoıylǵan suraqtardyń arasynda shyǵyn smetasy jasalǵan soń, ótemaqy qashan tóleıtini týraly boldy. Buǵan jaýap bergen ákim osy aptanyń ishinde komıssııaǵa alǵashqy qujattar ótkiziletinin aıtty. Komıssııanyń quramyna qoǵamdyq uıymdardan ókilder engizilgen. Olar smetany qoldasa, aqsha tóleý úshin qorǵa joldanady eken.
Ázirge 500-den asa úı qalpyna keltirilmeıtinin joǵaryda aıttyq. Sonsha jańa úıler Solnechnyı-2 shaǵyn aýdanynda salynyp jatyr. Onyń ústine kópqabatty eski úılerden páterler satyp áperilmek. Sóıtip, úıinen aıyrylǵandardyń bári de baspanamen qamtamasyz etilmek. Qurylysy bıyl bitetin jańa úılerdiń barlyǵy paıdalanýǵa taza kúıinde beriledi. Qazir Solnechnyı-2 shaǵyn aýdanynyń ózi de jóndelip, eki-úsh kóshege asfalt tóselip jatyr.
Soltústik Qazaqstan oblysy
