Sýretti túsirgen – Valerıı Býgaev
Bıyl sáýir aıynda sý tasqynyna baılanysty Aqtoǵaı aýdany Jalaýly aýlynda tótenshe jaǵdaı jarııalanǵan edi. Keıin sý tasqyny kezinde zardap shekken jáne komıssııanyń sheshimimen turýǵa jaramsyz dep tanylǵan 5 úı anyqtalyp, olardyń ornyna jańa qurylystar salyna bastady.
Osy apta basynda Pavlodar oblysynyń ákimi Asaıyn Baıhanov eldi mekenge arnaıy baryp, bıikteý tusqa salynyp jatqan jańa úılerdiń sapasyn tekserdi. Bul baspanalardyń qurylysy sáýir aıynyń basynda bastalyp, qurylysta 30 adam jáne 2 tehnıka jumys istep jatyr. Qazirgi ýaqytta barlyq úıdiń qabyrǵalary boı kóterip, eki úıdegi qurylys jumystary 90 paıyzǵa oryndalǵan.
«Jańa úılerdi salýǵa ERG toby qoldaý bildirdi. Jumystardy jergilikti «Stalmontaj» JShS júrgizip jatyr. Aýyl turǵyndaryna arnalǵan úılerdi osy aýdannyń jaýapty kásipkeriniń salýy men úshin mańyzdy boldy. Úılerge uzaq janatyn jylytý qazandyqtary, sýdy burýǵa arnalǵan shuńqyr ornatylady jáne ortalyq sý qubyryna qosylady. Turǵyn úılerdiń kiltterin ıelerine osy jyldyń shilde aıynyń basynda tabystaý josparlanyp otyr. Úılerdi tolyǵymen aıaqtap, adal tapsyrýdy júktedim», dedi óńir basshysy.
Buǵan qosa Jalaýly aýlynda búginde jalpy syıymdylyǵy 200 myń tekshe metr bolatyn 3 jańa qazanshuńqyrdyń qurylysy jalǵasyp jatyr. Bul bolashaqta aýyldy sý basý máselesin keshendi sheshýge múmkindik beredi. Ony da shilde aıynyń sońyna deıin aıaqtaý josparlanǵan.
Atap óteıik, Pavlodar óńiri alǵashqylardyń biri bolyp sý tasqyny kezinde múlki zardap shekken oblys turǵyndarynyń barlyq 125 ótinimi boıynsha ótemaqy tóledi.
Pavlodar oblysy,
Aqtoǵaı aýdany,
Jalaýly aýly
