Foto: egov.kz
Olar 2020 jyldan beri 507 úleskerden aqsha jınap, Aqtóbe qalasynyń №12 jáne «Batys-2» shaǵyn aýdandarynda kópqabatty bes úı salýǵa ýáde etken. Turǵyndar úılerine byltyr kirý kerek edi. Alaıda jurt qarjy salǵan úılerdiń kóbiniń irgetasy ǵana quıylsa, keıbiriniń qabyrǵalary jartylaı bitken. Sotta Jarashanov pen Karımov jurtqa 2,5 mlrd teńge zııan keltirgeni belgili boldy.
Prokýrordyń aıyptaý paraǵynda, «Bógde adamnyń múlkin aldaý jolymen ıelený maqsatynda Jarashanov 2022 jyldyń tamyzynan 2023 jyldyń maýsymyna deıin ózi basqaratyn turǵyn úı qurylysyna qarjy salýǵa úgittegen» dep jazylǵan. Bul jerdegi alaıaqtyqtyń shegi de kórinbeıdi. Turǵyn úı qurylysy júrip jatqan jer ýchaskesi de basqa adamnyń menshiginde bolyp shyqty.
Osydan tórt jyl buryn Aqtóbe qalasynyń turǵyny Márzııa Esenalıeva «Safına» qurylys kompanııasyna úsh bólmeli páter alý úshin 9 mln 200 myń teńge qarjy salǵan. Egde jastaǵy kisi kompanııa uzaq jyldan beri qurylys salasynda jumys istep kele jatqan soń sengenin aıtady. Sodan beri ne aqsha, ne páter joq. Taǵy bir úlesker Ǵalııa Qabdyrahmanova aıyptalýshy Jarashanovtyń sotqa deıin túrli aıla-áreketterge baryp, qorǵaýshylaryn jıi aýystyryp, ispen tanysýdy sozyp kelgenin aıtty. «Qurylys bastaldy da, kóp keshikpeı toqtady. Biz dabyl qaǵa bastadyq. Basynda Jarashanov kezdesýden qashyp júrdi. Sodan prokýratýraǵa shaǵymdandyq. Otbasym – 2020 jyly eń birinshi bolyp úıdiń tolyq qunyn tólegenderdiń biri. Kompanııa dırektorymen kelisimshart jasastyq. Sol ýaqytta ár úlesker kem degende 9 mıllıon teńgeden astam qarjy quıdy. Bul úsh bólmeli páterdiń baǵasy edi. Endigi úmitimiz – jergilikti bılik qurylysty sot osy qylmystyq iske qatysty sheshim shyǵarǵan soń bıýdjet esebinen aıaqtaımyz dep ýáde berip otyr. Alaıda jurt kútýden sharshady. Turyp jatqan úılerin satyp, barlyq qarjysyn «Safına» turǵyn úı keshenine salǵan otbasylar tórt jyldan beri bala-shaǵasymen páter jaldap júr», deıdi Ǵalııa Qabdyrahmanova.
Sot «Safına» kompanııasy basshylaryna qatysty sheshim shyǵarsa, úleskerlerdiń úıleri jergilikti bıýdjet qarjysy esebinen turǵyzylmaqshy. Osy maqsatta qalalyq ákimshilik janynan qurylys kompanııasy quryldy. Jergilikti bılik úleskerlerge jumsalǵan bıýdjet qarjysynyń ornyn bos páterlerdi satý jolymen toltyrýdy josparlap otyr.
Aqtóbe oblysy
