Quramynda Rýslan Qurbanov, Elmır Álimjanov, Vadım Sharlaımov jáne Erlik Sertaı syndy noıandary bar bizdiń komanda bastapqy básekelerde Ispanııa (45:24) men Ýkraınadan (45:37) basym tússe, jartylaı fınalda Fransııaǵa (37:45) jol berdi. Al qola medal úshin tartysta álem chempıondary degen ataǵy bar Izraılden (45:29) basym tústi. Sóıtip, jerlesterimiz qola medaldy moıyndaryna ildi.
– Qazaqstannyń shpagashylary jańa deńgeıge kóterildi. Jerlesterimiz Fransııa, Japonııa, Italııa, Majarstan sekildi memleketterdiń noıandarymen birge jer-jahandaǵy eń myqty komandalardyń sanatyna qosyldy. О́zderińiz baıqasańyzdar, úzdik úshtiktiń qatarynan kóriný bizdiń jigitter úshin turaqty kórsetkishke aınalyp otyr. Bıylǵy maýsymda ótken jeti komandalyq týrnırdiń tórteýinde otandastarymyzdyń jeńis tuǵyryna kóterilýi – osy sózimizdiń aıqyn dáleli. Atap aıtsaq, Ystanbuldaǵy Álem kýboginiń kezeńdik saıysynda – altyn, Qytaıdaǵy Azııa chempıonatynda – kúmis, Tbılısı men Parıjde ótken dúbirli dodalarda qola medaldy ıelendik. Sondaı-aq byltyr Hanchjoýda alaýy tutanǵan Azııa oıyndaryn da esten shyǵarmaǵan abzal. Atalǵan jarysta otandastarymyz Japonııa quramasynan bir ǵana upaı aıyrmashylyǵymen utylyp, kúmispen kúpteldi, – deıdi Qazaqstan quramasynyń memlekettik jattyqtyrýshysy Tımýr Baıtasov.
