Foto: MNU
2024 jyldyń 21-23 mamyr aralyǵynda Maqsut Narikbayev University «Quqyq» baǵyty boıynsha Oqý-ádistemelik birlestik uıymdastyrǵan sessııa alańyna aınaldy.
Maqsut Narikbayev University-de Joǵary jáne joǵary oqý ornynan keıingi bilim komıteti uıymdastyrǵan «Quqyq» baǵyty boıynsha OÁB sheńberinde zańgerlik bilim berýdi damytý tujyrymdamasyn ázirleý jónindegi strategııalyq sessııanyń ashylýy ótti. Bul sessııa Qazaqstanda zań bilimin damytýdyń jańa tujyrymdamasyn talqylaýǵa jáne ázirleýge arnalǵan.
Strategııalyq sessııanyń maqsaty aldaǵy jyldarǵa quqyqtyq bilim berýdi damytýdyń negizgi baǵyttary men basymdyqtaryn aıqyndaıtyn biryńǵaı tujyrymdama ázirleý.
Atalǵan sessııa jumysyna quqyq salasyndaǵy jetekshi mamandar, akademııalyq qoǵamdastyq ókilderi, bilim berý salasynyń jáne memlekettik organdardyń sarapshylary, sondaı-aq 52 joǵary oqý oryndary men vedomstvalyq oqý oryndarynyń ókilderi qatysady. Atap aıtqanda, QR Bas prokýratýrasy janyndaǵy Quqyq qorǵaý organdary akademııasy, QR Joǵary Sot Keńesi janyndaǵy Sot tóreligi Akademııasy jáne QR IIM Qaraǵandy akademııasy.
«Osy ýnıversıtettegi árbir adamdy ortaq bir mıssııa biriktiredi – sapaly ári qoljetimdi bilim berý arqyly halyqqa qyzmet etý. Bul bizdiń ustanatyn mıssııamyz. Sondyqtan búgin osy jerde jınalyp otyrǵanymyz da beker emes. Sebebi keleshekte bizdiń stýdentter alǵan bilimderi men daǵdylaryn qoǵamnyń ıgiligi úshin qoldanatyn bolady», dedi OÁB-niń «Quqyq» baǵyty boıynsha tóraǵasy Talǵat Nárikbaev.
QR ǴJBM Joǵary jáne joǵary oqý ornynan keıingi bilim komıteti tóraǵasynyń orynbasary Gúljan Jarasova óz sózinde sessııanyń úsh kúni ishinde ázirleıtin qujat Respýblıkalyq oqý-ádistemelik keńeske maýsym aıynda bekitýge usynylatynyn aıtty. Ol sondaı-aq bul qujat quqyq salasy baǵytyna kadrlar daıarlaý úshin jaýapkershilikti óz moınyna alǵan árbir JOO-nyń jumys ústel kitaby bolatynyn atap ótti.
Sonymen qatar sessııa sheńberinde qatysýshylar zańgerlik bilim berý júıesiniń aldynda turǵan barlyq negizgi máseleler men syn-qaterlerdi talqylady, sondaı-aq olardy sheshý úshin naqty qadamdar usyndy. Zańgerlik bilim berý sapasyn arttyrý, bilim berý baǵdarlamalaryn jańǵyrtý jáne oqytýdyń ınnovasııalyq ádisterin engizý máselelerine erekshe nazar aýdaryldy.
«Osy úsh kún ishinde barshańyz belsendi túrde bilim alyp, jumys isteýdiń arqasynda nátıjeli ýaqyt ótkizdińizder. Pikir almasyp, barlyq ıdeıalaryńyzdy qamtıtyn jáne damýdyń kelesi qadamdaryn anyqtaıtyn joba qujatyn jasadyńyzdar», dedi QR ǴJBM Joǵary jáne joǵary oqý ornynan keıingi bilim komıteti tóraǵasy Gúlzat Izbasarqyzy Kóbenova.
Sessııa qorytyndysy boıynsha QR ǴJBM Joǵary jáne joǵary oqý ornynan keıingi bilim komıteti tóraǵasy atynan qatysýshylarǵa sessııadan ótkeni týraly sertıfıkattar tabys etildi.
Strategııalyq sessııanyń qorytyndylary Tujyrymdamanyń sońǵy nusqasyn qalyptastyrý kezinde eskeriledi.
