Ormanshylar qýraǵan aǵashtardy kesip, órtten qorǵaý jolaqtaryn ornatyp, kógaldandyrý jumystaryn júrgizdi. Bul kúni Aqtóbe orman jáne janýarlar dúnıesin qorǵaý mekemesiniń mamandarymen birge «Jasyl el» jasaǵynyń 60-tan asa múshesi de «Zarechnyı-3» turǵynjaı aýmaǵynda tazalyq jumysyn júrgizdi.
«Aqtóbe orman jáne janýarlar dúnıesin qorǵaý mekemesi» KMM dırektory Amangeldi Altynbaevtyń aıtýynsha, osy mekemeniń 130 qyzmetkeri Aqtóbe orman sharýashylyǵy mekemesine qarasty aýmaqty tazalady. Bul – 22 myń gektar aýmaq, ony bir kúnde retke keltirý ońaı emes. Mekeme qyzmetkerleri kúni boıy toǵaı arasynan 60 myń tonna qoqys shyǵardy. Ásirese eldi mekenderge jaqyn toǵaılardyń ishi las. «Zarechnyı-1, 2, 3», «Aqjar» eldi mekenderiniń turǵyndary turmystyq qaldyqtar men qoqystaryn aǵash arasyna tastaý ádetin qoıar emes. Bul – shildeniń shilińgir ystyǵynda orman órtiniń tutanýyna basty sebepshi. Adamdarymyz toǵaı arasyn búldirmeý mádenıetin úırenýi kerek deıdi ormanshylar. О́ıtkeni 22 myń gektar toǵaı ishin únemi qadaǵalap, jurttyń artyn jınap otyrý ońaı emes. Onyń ústine ormanshynyń negizgi mindeti – qoqys shyǵarý emes, toǵaı ishin qýraǵan aǵashtardan aryltyp, kóshet egý jáne olardy kútip-baptaý, orman órtinen qorǵaý.
Aqtóbe oblysynda memlekettik orman qorynyń jalpy aýmaǵy 217,8 myń gektardy qurasa, onyń ishinde ormanmen kómkerilgeni – 51,8 myń ga. О́ńirde orman kólemi óte az. Qatań klımattyq beldeýde ornalasqandyqtan, bul jaqta sýyqqa tózimdi aǵashtar men butalar jaqsy ósedi. Al kóktemde ne kúzde egilgen jas kóshetter tamyry bekip ketkenshe jaqsy kútimdi qajet etedi ári jaz mezgilinde olardy kóp sýarý qajet.
Aqtóbe oblysy
