Balýandarymyz oısyraı utyldy
Ekinshi jarys kúni elimizdiń bes dzıýdoshysy tatamıge shyqqanymen, barlyǵy da bastapqy básekede jeńilistiń kermek dámin tatty. Ásirese 66 kg salmaq dárejesinde kúsh synasqan Ǵusman Qyrǵyzbaevqa zor senim artqan edik. 31 jastaǵy saqa sportshy osydan úsh jyl buryn Býdapeshtte ótken dúnıejúzilik dodada kúmis medaldy ıelengen edi. Odan bólek, Azııa chempıonatynda eki ret jeńis tuǵyryna kóterilip, Grand Slem men Gran-prı týrnırlerinde top jardy. Bir sózben aıtsaq, Ǵusman – tájirıbesi ábden tolysqan, bir basyna jeterlik ataq-dańqy bar balýan. Biraq Ábý-Dabıdegi dodaǵa ol daıar bolmaı shyqty. Qyrǵyzbaev alǵashqy aınalymda Izraıldiń ókili Tal Flıkerge jol berdi.
73 kg salmaqtaǵy Danııar Shamshaevtyń da esimi kópshilikke etene tanys. Jas daryn 2022 jyly Astanada aıdy aspanǵa bir-aq shyǵaryp, Azııa chempıony atandy. Bir keremeti, sol ataqqa qol jetkizýge Danııarǵa bar-joǵy 149 sekýnd jetkilikti boldy. Iаǵnı 2,5 mınýttaı ýaqytta ol tórt birdeı qarsylasyn jolynan yǵystyryp, sary qurlyqtyń bas balýany deńgeıine jetti. Biraq Parsy shyǵanaǵynda Shamshaev «shabysynan» jańyldy. Bul jarysta qandasymyz moldovalyq Ádil Osmanovtan oısyraı utyldy. Sol sekildi Janarys Rahmetqalı (66 kg) fransııalyq Valıd Hııarǵa, Baqytjan Ábdirahmanov (73 kg) germanııalyq Igor Vandtkege, Baqyt Qusaqbaeva (57 kg) túrkııalyq Achelıa Topyraqqa ese jiberdi.
Sol kúni 73 kg salmaq dárejesinde kúresken ázerbaıjandyq Hıdaıat Geıdarovtyń asqan sheberligine tánti boldyq. Ol kosovalyq Akıl Gıakova, ıspanııalyq Salvador Kases Rosa, brazılııalyq Danıel Kargnın, germanııalyq Igor Vandtke jáne japonııalyq Tatsýkı Ishıharany jeńip, álem chempıony atandy. Bul balýan bizge de bóten emes. Hıdaıat 1997 jyldyń jazynda Qaraǵandyda dúnıege kelgen. Balaýsa shaǵynda áke-sheshesimen birge tarıhı otanyna qonys aýdardy. Ázerbaıjan quramasy sapynda ol álem chempıonatynyń úsh dúrkin qola júldegeri, tórt dúrkin Eýropa chempıony, Dúnıejúzilik ýnıversıadanyń eki dúrkin júldegeri, Eýropa oıyndarynyń qola júldegeri, Islam yntymaqtastyǵy oıyndarynyń jeńimpazy atandy. Mine, endi H.Geıdarov óziniń sporttyq mansabyndaǵy eń zor tabysqa qol jetkizip otyr.
Jeńimpazdar men júldegerler
Erler. 66 kg: 1. Rema Tanaka (Japonııa), 2. Takeshı Takeoka (Japonııa), 3. Lýkas Saha (Fınlıandııa) men Vaja Margvelashvılı (Grýzııa).
73 kg: 1. Hıdaıat Geıdarov (Ázerbaıjan), 2. Tatsýkı Ishıhara (Japonııa), 3. Anhzaıa Lavdjargal (Mońǵolııa) men Nıls Stýmp (Shveısarııa).
Áıelder. 57 kg: 1. Heo Mımı (Ońtústik Koreıa), 2. Krısta Degýchı (Kanada), 3. Djessıka Klımkeıt (Kanada) men Momo Tamaokı (Japonııa).
Esmıgúl ese jiberdi
Úshinshi kúni Qazaqstannyń eki dzıýdoshysy óner kórsetýge tıis edi. Biraq densaýlyǵynyń syr berýine baılanysty 81 kg salmaqtaǵy Abylaıhan Jubanazar tatamıge shyqqan joq. Osy oraıda federasııa basshylary men ulttyq qurama bapkerlerine qoıatyn mynadaı suraǵymyz bar: Asa mańyzdy jarysqa qatysqaly otyrǵan balýan aldyn ala tekseristen ótpegen be? Eger onyń densaýlyǵynda aqaý bolsa, dúnıeniń dúldúl júırikteri bas qosqan básekege aparýdyń ne qajeti bar edi? Sonda keń baıtaq Qazaq elinde Abylaıhandy almastyratyn eshkim tabylmady ma? Buǵan basshylar men bapkerlerdiń aıtar ýáji qandaı?
Sodan barsha qazaq jankúıerleriniń nazary 22 jastaǵy Esmıgúl Kýıýlovaǵa aýdy. Byltyr Azııa oıyndary men bıyl qurlyq chempıonatynda qola medaldy moınynda jarqyratqan burymdymyz jarysty sátti bastady. Tusaýkeser kezdesýinde Esmıgúl qyrǵyzstandyq Adına Kochkonbaevany qapy qaldyrdy. Ekinshi kezeńde Kape-Verde ókili Sandra Bıllıettiń aıaǵyn kókten keltirdi. Biraq odan árige Kýıýlovanyń áli jetpedi. Úshinshi aınalymda Eýropa chempıonatynyń qola júldegeri, polshalyq Anjelıka Shımanskaıaǵa ese jibergen ol jarys jolynan shyǵyp qaldy.
Jeńimpazdar men júldegerler
Erler. 81 kg: 1. Tato Grıgalashvılı (Grýzııa), 2. Tımýr Arbýzov (Reseı), 3. Lı Djýn Hvan (Ońtústik Koreıa) men Somon Mahamadbekov (Tájikstan).
Áıelder. 63 kg: 1. Djoan van Lıshaýt (Nıderland), 2. Anjelıka Shımanskaıa (Polsha), 3. Klarıss Agbenený (Fransııa) men Laýra Fazlıý (Kosovo).
Qyzdardan da qaıyr bolmady
Tórtinshi kúni eki burymdymyz bozkilemge bettedi. 70 kg salmaqtaǵy Ekaterına Tokarevany Reseıden «Osy bizdiń kósegemizdi kógertedi» dep attaı qalap aldyrǵan edik. Buǵan deıin ol óz eliniń chempıonatynda kúmis júldeger atanyp, birneshe halyqaralyq jarysta oljaǵa keneldi. Biraq ulttyq komandanyń sapyna ilige almaǵannan keıin Qazaqstanǵa qonys aýdarýdy qup kórdi. Byltyr el birinshiliginde bas júldeni oljalaǵannan keıin túrli baıraqty básekelerde Qazaq eliniń týy astynda óner kórsete bastady. Alaıda áli de aýyz toltyryp aıtarlyqtaı tabysqa jete alǵan joq. BAÁ-degi jarystyń alǵashqy aınalymynda Tokareva ózbekstandyq Gúlnoza Matnııazovany jeńgenimen, ekinshi kezeńde ıspanııalyq Aı Sýnodoǵa ese jiberdi.
78 kg salmaqtaǵy Arýna Jangeldınanyń da ulttyq qurama sapynda júrgenine biraz jyldyń júzi boldy. Biraq onyń da jetistigi shamaly. Ári ketkende qurlyqtyq deńgeıdegi jarystarda júlde alýmen shektelip jatyr. Álemdik dodalarda alǵashqy aınalymdardan asqan emes. Bul joly da solaı boldy. Arýna tusaýkeser kezdesýinde ulybrıtanııalyq Emma Reıdtiń «ońaı oljasyna» aınaldy. Al erlerdiń 90 kg salmaq dárejesinde qazaq balýandary óner kórsetken joq.
Jeńimpazdar men júldegerler
Erler. 90 kg: 1. Gokı Tadzıma (Japonııa), 2. Nemanıa Maıdov (Serbııa), 3. Erlan Sherov (Qyrǵyzstan) pen Trıstanı Mosahlıshvılı (Ispanııa).
Áıelder. 70 kg: 1. Margo Pıno (Fransııa), 2. Marı-Iv Gaıe (Fransııa), 3. Shıho Tanaka (Japonııa) men Madına Taımazova (Reseı).
78 kg: 1. Anna-Marııa Vagner (Germanııa), 2. Alısa Bellandı (Italııa), 3. Madlen Malonga (Fransııa) men Emma Reıd (Ulybrıtanııa).
