Tusaýkeser kezdesýde Ǵalym Mambetálıevtiń shákirtteri Fransııany (3:1) jeńgen edi. Biraq odan keıin Slovakııa (2:6), Latvııa (0:2), Shvesııa (1:3), Germanııa (2:8) jáne AQSh-qa (1:10) ese jiberdi. Qatarynan bes oıynda utylǵannan keıin elıtalyq dıvızıonnan shyǵyp qalý qaýpi týyndady. Elıtalyq dıvızıonda qalý úshin sońǵy kezdesýde qalaı da Polsha quramasyn utý qajet boldy. Bir qýantarlyǵy, bizdiń jigitter ol jospardy oıdaǵydaı júzege asyrdy.
Polshaǵa qarsy básekede alǵashqy shaıbany qarsylastar soqty. 10-mınýtta Kamıl Valega qorǵaýshylardyń qateligin utymdy paıdalanyp, Andreı Shýtov qorǵaǵan qaqpadan sańylaý tapty. Biraq bul jaǵdaı jerlesterimizdiń jigerin jasyta alǵan joq. Kózdi ashyp-jumǵansha Nıkıta Mıhaılıs tarazy basyn teńestirdi. Tablodaǵy bul esep uzaqqa deıin saqtaldy. Oıynnyń sońǵy 10-mınýtynda elimizdiń hokkeıshileri qarqynyn qaıta kúsheıtip, qatarynan eki shaıbany qaqpaǵa engizdi. Bul goldardyń avtorlary – Valerıı Orehov (51-mınýt) pen Roman Starchenko (55-mınýt). Qorytyndy esep – 3:1. Sóıtip, otandastarymyz kelesi jyly da elıtalyq dıvızıonda kúsh synasý quqyǵyn saqtap qaldy.
Álem chempıonatynyń jalpy barysy jaıynda aıtar bolsaq, A tobynda Kanada (19 upaı) jeke-dara kósh bastady. Ekinshi oryndy Shveısarııa (17 upaı) ıelense, Chehııa (16 upaı) úshinshi satyǵa taban tiredi. Úzdik tórttikti Fınlıandııa (10 upaı) túıindedi. V tobynda Shvesııa (21 upaı) shashasyna shań juqtyrmady. Skandınavııa túbeginiń túlekteri 100 paıyzdyq kórsetkishke qol jetkizdi. Odan keıingi satylarǵa AQSh (16 upaı), Germanııa (15 upaı), Slovakııa (12 upaı) jaıǵasty.
Keshe shırek fınaldyq básekeler ótip, myna komandalar ózara sheberlik baıqasty: Kanada – Slovakııa, Shveısarııa – Germanııa, Chehııa – AQSh jáne Fınlıandııa – Shvesııa. Endi alda – jartylaı fınal (25 mamyr), qola medal úshin tartys (26 mamyr) jáne fınal (26 mamyr).
