Foto: ru.freepik.com
- Qazaqtyń tanymal kásipqoı boksshysy Batyr Júkembaev (23-1, 17 KO) kezekti jekpe-jeginde jeńiske jetti. AQSh-tyń Plant-Sıtı qalasynda ótken jarysta ol ýkraınalyq Ivan Redkachpen (24-7-1, 19 KO) judyryqtasty. Bul báseke besinshi raýndta tehnıkalyq nokaýtpen aıaqtaldy. Sóıtip, Batyr ózine tıesili birinshi jartylaı orta salmaqtaǵy WBA Continental North Americas nusqasynyń altyn belbeýin saqtap qaldy.
- Shaıbaly hokkeıden Qazaqstannyń ulttyq quramasynyń bas bapkeri aýysty. Bul kúnge deıin osy qyzmetti atqaryp kelgen Ǵalym Mámbetálıevtiń ornyna Devıd Nemırovskı keldi. Kezinde Tómengi Novgorodtyń «Torpedo», Novosibirdiń «Sıbır» klýbtaryn jattyqtyrǵan maman ulttyq komandamyzben qosa, Astananyń «Barysyn» da baptaıdy.
- 4-26 mamyr aralyǵynda Almatydaǵy ústel tennısi ortalyǵynda Ortalyq Azııa aımaǵy boıynsha irikteý týrnıri ótedi. Atalǵan jarysqa Iran, Qyrǵyzstan, Túrikmenstan, О́zbekstan, Qazaqstan quramalary qatysady. Bul básekede Qazaq eli namysyn Alan Qurmanǵalıev, Abdýlla Mamaı, Qadyráli Qabdylýahıtov, Danıan Shı, Sarvınoz Mirqadyrova, Janerke Kóshkimbaeva, Álbına Jaqsylyqova, Alısa Svıgýn syndy sportshylar qorǵaıdy.
- Áıgili Forbes jýrnaly 2024 jyldyń alǵashqy aılarynda eń kóp tabys tapqan sportshylardyń reıtıngin jarııalady. Kósh basynda – Krıshtıaný Ronaldý. Portýgalııa fýtbolshysynyń tabysy – 260 mln dollar. Sondaı-aq TOP-10-dyqqa Djon Ram – $218 mln, Lıonel Messı – $135 mln, Lebron Djeıms – $128,2 mln, Iаnnıs Adetokýnbo – $111 mln, Kılıan Mbappe – $110 mln, Neımar – $108 mln, Karım Benzema – $106 mln, Stefen Karrı – $102 mln, Lamar Djekson $100,5 mln tabyspen endi.
- Perý astanasy Lımada aýyr atletıkadan jasóspirimder arasyndaǵy álem birinshiligi bastaldy. Bul jarysta Qazaqstannyń týy astynda myna ziltemirshiler óner kórsetip jatyr: Aqjol Qurmanbek (67 kg), Álı Medetbaev (73 kg), Nurdos Sabyr (89 kg), Bekbolat Qalı (96 kg), Dıdar Abdolla (102 kg), Edil Asqarov (+102 kg), Darıa Balabaıýk (59 kg), Aıanat Jumaǵalı (76 kg), Sánııa Ormanbaeva (81 kg).
