Túrki dúnıesiniń abyroıyn kótergen jıynda Qazaqstan atynan Mádenıet jáne aqparat mınıstri Aıda Balaeva sóz sóılep, elaralyq baılanysqa qatysty óreli pikir bildirdi. Sondaı-aq mańyzdy forýmǵa mádenıet, til-ádebıet, ekologııa salasy ókilderi, IýNESKO-nyń óńirlik mamandary, kitaphana basshylary qatysty. О́zara áriptestik aıasynda ótken basqosý qarym-qatynastyń jańa deńgeıge kóterilgenin aıqyndady.
Atalǵan halyqaralyq is-shara aıasynda Túrikmen Ǵylym akademııasy Mahtymquly atyndaǵy Til, ádebıet jáne ulttyq qoljazbalar ınstıtýty «Mahtymquly Pyraǵynyń danalyq qazynasy» atty ǵylymı-teorııalyq konferensııa ótkizdi.
Ǵylymı forýmǵa qatysýshylar Maqtymquly atyndaǵy mádenıet parki keshenin tamashalap, osynda ornatylǵan álemdik 24 tulǵanyń eskertkishimen tanysty. Olardyń ishinde qazaqtyń áıgili kúıshi-kompozıtory Qurmanǵazy eskertkishiniń boı túzegenin aıta ketkimiz keledi. Osy parktiń joǵarǵy jaǵyndaǵy qyratta Maqtymqulynyń 60 metrlik tastan somdalǵan beınesi menmundalap tur. Avtory – osy eldiń ataqty skýlptory Saragt Babaev.
«Qazaq gazetteri» seriktestiginiń bas dırektory Dıhan Qamzabekuly Túrki elderi jáne basqa da sheteldik ǵalymdarymen, qaıratkerlerimen suhbattasyp, Qazaqstan mádenıeti men merzimdi basylymdaryn tanymaldandyrý týraly keńesti. Bulardyń ishinde Reseı, Qytaı, Iran, AQSh, Túrkııa, Ońtústik Koreıa, Grýzııa, Lıtva, Polsha, Qyrǵyzstan, О́zbekstan, Ázerbaıjan, t.b. elderdiń ádebıettanýshy, tilshi, tarıhshy, mátintanýshy, mádenıettanýshy, áleýmettanýshy, medıatanýshy kásibı mamandary boldy.
17 mamyrda «Sport» qonaqúıiniń májilis zalynda «Túrikmenstan» gazetiniń bas redaktory Kakamurat Rejepovpen, «Neıtralnyı Týrkmenıstan» gazetiniń bas redaktory Maııa Alımovamen, «Gúnesh» (balalar jýrnaly) bas redaktory Gúlálek Babaevamen kezdesip, Qazaqstan men Túrikmenstan tarıhı tulǵalaryn tanymaldandyrý týraly ýaǵdalasty. Áriptes eldiń gazet basshylary «Qazaq gazetteri» basshylyǵynyń: «Tarıhta aıryqsha orny bar kemi 20 tulǵany anyqtap, túrli formatta nasıhattaıyq. Búgingi qoǵamǵa eńbek sińirip jatqan dıaspora ókilderi kórsetip otyraıyq. Qos eldiń ǵylym, bilim, mádenıet, sport baǵytyndaǵy sańlaqtaryn birlese jazaıyq» degen usynysyn qoldady. Sondaı-aq Alash baspasózinde orny bar túrikmen qalamgeri, ǵalymy Kúmishálı Bórıevti birlese nasıhattaý eki el úshin de mańyzdy ekeni aıtyldy. BAQ basshylary kezdesýinde balalar sýretshileriniń tájirıbe almasýy, «Meniń týǵan ólkem» taqyrybynda qazaq-túrikmen oqýshylarynyń onlaın esse baıqaýyn ótkizý usynylyp, qoldaý tapty.
18 mamyrda «Mahtymquly Pyraǵynyń danalyq qazynasy» halyqaralyq konferensııasynyń negizgi jumys kúninde akademık D.Qamzabekuly «Túrikmen mádenı áleminiń bıik qubylysy» atty baıandama jasady. Tústen keıin osy eldiń Mádenıet ınstıtýtynda ótken «Mahtymquly jáne onyń zamany» atty seksııalyq jıynyna moderatorlyq etti. Osy kúni Túrikmenstannyń «Altyn ǵasyr» telearnasyna suhbat berdi.
