Sýretterdi túsirgen – Erlan OMAR, «EQ»
Mektep ishindegi merekelik atmosfera á degennen áserge bóledi. Alystan estilgen oqýshylardyń shat-shadyman kúlkisi bizdi buıdalap ákelip, О́tebaı Turmanjanov atyndaǵy kabınettiń aldynan bir-aq shyǵardy. Sóıtsek, 1-synyptyń búldirshinderi eken. Balalardyń bilimge degen qulshynystary tilderinen de, túrlerinen de kórinip-aq tur. Muǵalim suraq qoıyp, oǵan oqýshylar jamyraı jaýap berip jatyr. Biz qashanǵy qarap turamyz? Basymyzdy ızep, kabınetke enip kettik. Muǵalim suraqtar legin jalǵastyryp jatty. «Balalar, elimiz táýelsizdigin qaı jyly aldy?». Sál ǵana únsizdik. Sodan soń, «1991 jyly» dep sańq etti Láılá esimdi aqyldy qyz. «Oı jaraısyń!» desti ata-analar. Basqa búldirshinder de bas qalamyzdyń ataýyn, rámizderdiń avtorlaryn, elimizdiń qaı memlekettermen shektesetinin múdirmeı, birinen soń biri aıtyp jatty. Munymen toqtap qalmaı, búldirshinder uly aqynnyń óleńderin jatqa oqyǵanda ájeptáýir áserlenip qaldyq. Ne degenmen Abaı mektebiniń shákirtteri ǵoı. Synyp saǵatynyń aıasynda Oqý-aǵartý mınıstri Ǵanı Beısembaev beıne joldaý arqyly barlyq mektep oqýshylaryn 2023-2024 oqý jylyn sátti aıaqtaýlarymen quttyqtady.
«Osy aıtýly oqıǵany alǵash ret «Bilimim – Otanyma» taqyrybynda jańa formatta atap ótemiz. Bul – bir jyl atqarǵan jumysty qorytyndylap, muǵalimderge, mektep ujymyna, ata-analaryńyzǵa alǵys aıtýǵa jasalǵan múmkindik. О́ıtkeni sizderdiń eńbekpen alǵan bilimderińiz Otanǵa degen súıispenshilik pen qurmettiń belgisi. Bir jylda sizder eseıip, oqýda, shyǵarmashylyqta, sportta úlken jetistikterge jettińizder. Sizderdi shyn júrekten quttyqtaımyn jáne munymen toqtap qalmaýlaryńyzdy tileımin!», dedi ol.
Jıynnyń sońyna qaraı synyp jetekshisi oqý jylyn úzdik aıaqtaǵan ozattarǵa maqtaý qaǵazyn tabystady. Rasymen, maqtaýǵa turarlyq oqýshylar. Osy sátte kózimniń qıyǵymen ata-analarǵa qaradym. Bári de súıkimdi jymıyp otyr. Balań jaqsy dese janyń súısinedi, jaman dese janyń kúıedi degen osy ǵoı, shirkin.
Synyp saǵatynyń sońyna qaraı 11-synyp oqýshylarymen júzdeskim keldi. Júzdestim de. Túlekter «Men. Mektep. Ustaz» degen taqyrypta esse jazyp jatyr eken. Olardy kórip, «Armanymnyń bárin jazsam, dápterge syımas edi» degen Qojanyń beınesi kóz aldyma keldi. Sodan 11 á synybynyń oqýshysy, altyn belgi ıegeri Tájikenova Arýjannnyń pikirin bildik.
«Meniń boıymda dál qazir qımastyq, saǵynysh, úmit, qobaljý syndy aralas sezimder bolyp jatyr. О́ıtkeni partalas qurby-qurdastarymdy qımaımyn. Odan bólek mekteptegi qyzyqty sátterdi de endi tek saǵynyshpen eske alatynymyz qıyn. Mektep degen bul – jaı ǵana mekeme emes, ol bizdiń jyly sátterge toly ystyq uıamyz ári tulǵa retinde qalyptastyrǵan úlken otbasymyz. Ulttyq biryńǵaı testileýdiń de ýaqyty jaqyndaǵan saıyn qobaljyp júrmiz. Biraq men ózime senimdimin. О́ıtkeni 9-synyptan bastap bolashaq mamandyǵymdy tańdap qoıǵam. Buıyrsa Eýrazııa ulttyq ýnıversıtetiniń Sáýlet óneri mamandyǵyna talaptanyp otyrmyn», deıdi A.Tájikenova.
Jas talapkerlerge aldaǵy synaqtardan sátti ótýin tileımiz!
