Sáýlet óneriniń úlgisi derlik ǵajaıyp meshit tek ǵıbadat orny emes, elimizdegi biregeı Islam ortalyǵy bolmaq. Meshittiń ashylýyna Saýd Arabııasynan Qurandy kórkemdep kóshirgen sheber sheıh, atajurtyna tuńǵysh taban tiregen toqsan jastaǵy Osman Toha qarııa kelip qatysty.
Saltanatty is-sharada Shymkent qalasynyń ákimi Ǵabıt Syzdyqbekov Prezıdent Qasym-Jomart Toqaevtyń Quttyqtaý hatyn oqyp berdi. Qala basshylyǵy sheıh Osman Tohaǵa arnaıy syı-sııapat kórsetti. Medına qalasynan at arytyp kelgen mártebeli meımannyń ıyǵyna Qazaqstan musylmandary dinı basqarmasynyń tóraǵasy, bas múftı Naýryzbaı qajy Taǵanuly zerli shapan japty. Al osynaý záýlim meshit salyp bergen mesenat Serikjan Seıtjanovtyń tósine QMDB 30 jyldyǵyna oraı shyǵarylǵan merekelik medal taǵyldy.
Sheıh Osman Toha qarııa qasıetti jıynda sóz alyp, aq batasyn berdi. Qazaqstanǵa, ata-babasynyń kindik qany tamǵan jerge aıaq basqanyna óte qýanyshty ekenin jetkizdi. Aq saraıdaı alyp meshittiń ashylýy qazaq halqynyń din Islamǵa beriktigin, Quran men súnnetti syılaıtynyn, ózderiniń shynaıy musylman ekenin kórsetetinin aıtty. Alla Taǵala qazaq eliniń keleshegin kemel etip, Islam dinine qýat bersin, osy meshitten tálim alǵan jastar bolashaqta eldiń rýhanı berik qamalyn qalaǵan myqty mamandar bolyp shyǵyp, Qazaqstannyń atyn álemge máshhúr ete bersin degen bata-tilegin arnady.
Aıta ketý kerek, Osman Toha sheıhtiń Islam dinine qosqan teńdessiz úlesi – ol kisi Quran Kárimdi san márte kórkem husnıhatpen kóshirip jazǵan. Sonyń negizinde qasıetti kitap baspahanada mıllıondaǵan tırajben basylyp shyqqan. Búgingi tańda álemdegi mıllıondaǵan musylmannyń tórinde ilýli turǵan, kúndelikti oqyp júrgen Quran Kárimi babalary Túrkistan topyraǵynda týǵan kallıgrafııa óneriniń has sheberi, zerdeli tulǵa Osman Toha eńbeginiń arqasy.
Saltanatty is-sharaǵa qatysqan Senat depýtaty Álı Bektaev pen Májilis depýtaty Danabek Isabekov te jyly lebizderin arnady. Á.Bektaev óz sózinde osynaý qýanyshty sát tek Shymkent qalasy úshin emes, búkil qazaq eli úshin ortaq ekenin atap ótti. Depýtat Senat tóraǵasy Máýlen Áshimbaevtyń osy tarıhı kúnge arnap joldaǵan quttyqtaý hatyn oqyp berip, keleshekte meshit Islam iliminiń ortalyǵyna aınalyp, qazaq halqynyń rýhanı kemeldenýine jemisti eńbek ete beretinine zor senim bildirdi. D.Isabekov ońtústik óńirinen saılanǵan bir top májilismenniń aıtýly kúnge oraı joldaǵan ystyq yqylasy men sálemin jetkizdi.
Ashylý saltanatynda qulshylyq úıi jaıynda qyzyqty derekter de jarııalandy. IýNESKO-nyń arnaıy ókili, Samarqand qalasyndaǵy úlken ıslamı zertteý ortalyǵynyń dırektory Álim Faızýllaev Shymkentke arnaıy at basyn tirep, jamaǵatpen birge qýanyshty sátti bólisti. Qutty qonaq mesenat, úlken júrekti azamat Serikjan Seıitjanovtyń dinı qundylyqty qasterlep, keleshek urpaqty oılaǵan janashyrlyq peıil, nıetine shynaıy rızashylyǵyn bildirdi. El tanıtyn kásipker óziniń kásipshiligimen bir jaǵynan halqyna ekonomıkalyq turǵydan paıdasyn tıgizip otyrsa, ekinshi jaǵynan túrli áleýmettik jobalardyń bastamashysy retinde eldiń rýhanı jańarýyna úles qosyp kele jatqan qaısar azamat ekenin, qaı qyrynan alsa da, meıli rýhanı nemese materıaldyq bolsyn, bolashaqqa ınvestısııa salyp jatqan úlgili kásipkerlerdiń biri ekenin erekshe atap ótti.
Qasıetti juma kúngi namazdyń aldynda ótken saltanatty basqosýdyń resmı bóliginiń sońynda qorytyndy sózimen jıyndy qorytyndylaǵan mesenat Serikjan Seıitjanov záýlim meshittiń qazaq halqynyń asyl dini men aıaýly dástúrine qyzmet ete beretine tilektestigin bildirip, qulshylyq ordasyn Qazaqstan musylmandary dinı basqarmasynyń qaramaǵyna amanattap tapsyratynyn málim etti.
«Megapolıs tórinde ashylǵan záýlim meshit halqymyzdyń rýhanı qazynasyn baıytýmen qatar Islam dininiń dińgegin nyǵaıtýǵa septigin tıgizetini anyq. Ol eldiń kópsalaly rýhanı ári mádenı-aǵartý ortalyǵyna aınalady degen senim mol. Ásili, meshit salý bizdiń ata-babamyzdan bastaý alady. Tarıhtan tamyr tartsam, ótken ǵasyrdyń basynda Meńlibaı babamyz eki ret aýyldastarymen birge qajylyq saparǵa baryp qaıtqan. Babamyz bar múlkin úsh uly Esjan, Qurtaı, Smaıylǵa bólip berip, qalǵanyn meshit salýǵa jumsaǵan. Sanaly ǵumyryn saýapty isterge arnap, Allanyń aq jolynan aınymaǵan Meńlibaı babamyzdyń sara jolyn biz de jazbaı, jańylmaı jalǵastyryp kelemiz. Táýelsizdiktiń alǵashqy jyldarynda Shilik aýylynan Meńlibaı babamyzdyń atynan meshit ashyp, el ıgiligine paıdalanýǵa berdik. Atamyz Esjan da saýdagerlikti kásip etken, tabystyń qazanyn tasytqan, kóregen, izgi jan bolǵan. Onyń atymtaı jomarttyǵy áli kúnge deıin ózi týǵan óńirdegi jalpaq jurttyń jadynan shyqqan emes. Atamyz qarshadaı uly Seıitjandy Buharadaǵy medresege oqýǵa jiberedi. Ákemiz 12 jasynda Quran Kárimdi tápsirlep, jatqa aıtatyn dárejege jetip elge oralady. Ákemizdiń esimi el esinde qalsyn dep men de meshit salýǵa táýekel ettim. О́ıtkeni asyl dinimizdegi mindet ata-anaǵa sheksiz qyzmet etýge úgittese, meshit salǵandy da Jaratýshynyń meıirim-shapaǵatyna qısapsyz bólenetin saýaby jeteleıdi», dedi kásipker.
Mesenat sóz barysynda sondaı-aq 300 oryndyq jańa medresege Osman Toha sheıhtiń esimin berý týraly Qazaqstan musylmandary dinı basqarmasymen birlesip arnaıy sheshim qabyldaǵanyn málimdedi.
Jalpy, jańa meshit Qazaqstanda kólemi jaǵynan ekinshi úlken qulshylyq úıi bolyp sanalady. Munda bir mezette 12 myń adam namaz oqı alady. Qasbeti aq marjandaı mármar tastarmen kómkerilgen erekshe sáýletti bul ǵımarat álemdegi sulýlyǵymen tańdaı qaqtyrǵan, sáýlettik keskin kelbeti aıryqsha Birikken Arab Ámirlikterindegi sheıh Ben Zaııd atyndaǵy meshit pen Úndistandaǵy Táj-Mahaldan keıingi úshinshi ǵıbadat ordasy atanyp otyr. Meshit astynan 800-ge jýyq avtokólik sııatyn turaq qarastyrylǵan. Sondaı-aq jýyq arada meshit janynan eldi ımandylyqqa úgittep, rýhanı saýat ashatyn telestýdııa ashylady.
ShYMKENT
