Kezinde jastar býyny arasyndaǵy jarystarda jaqsy nátıje kórsetken Anna 2012 jyly Londonda alaýy tutanǵan Olımpııa oıyndarynda 69 kg salmaq dárejesinde óner kórsetip, úzdik bestikti túıindedi. Onyń kórsetkishi – 251 (115+136) kg. Alaıda arada biraz ýaqyt ótkennen soń Belarýstiń qos sportshysy – atalǵan jarystyń qola júldegeri Marına Shkermankova men tórtinshi satyǵa jaıǵasqan Dına Sazanovestiń dopıng qoldanǵany anyqtalyp, olar túrli merzimge úlken sporttan shettetildi. Sonyń arqasynda Nurmuhambetova úshinshi orynǵa kóterildi. Kóp uzamaı kúmis medaldy ıelengen rýmynııalyq Roksana Kokoshtyń da qanynan ruqsat etilmegen dári-dámektiń nyshany tabylyp, ol da qatań jazalandy. Osylaısha, London Olımpıadasynyń kúmis júldesi bizdiń qyzǵa buıyrdy.
Kúni keshe Perýde ótken jasóspirimder arasyndaǵy álem birinshiligi barysynda Halyqaralyq Olımpıada komıtetiniń (HOK) qurmetti múshesi Ivan Dıbos London Olımpıadasynyń kúmis medalin Anna Nurmuhambetovaǵa saltanatty túrde tabys etti. Sóıtip, arada 12 jyl ótkennen soń júlde óz ıesin tapty.
Saltanatty rásimde tolqynysyn jasyra almaǵan Anna: «Perýdegi álem chempıonatyna kelgenimen qýanyshtymyn. Bul jerde maǵan Olımpıadanyń medali tabystaldy. Qazir qandaı sezimde ekenimdi qur sózben jetkize almaspyn. Meni marapattaǵan federasııa men HOK múshesine óz alǵysymdy bildiremin. 2012 jylǵy Olımpııa oıyndarynyń kúmis júldegeri atanǵanyma qýanyshtymyn. Bul – meniń mansabymdaǵy eń iri tabys. Osy jarysqa qatysyp jatqan jas sportshylarǵa tabys pen tózim jáne sáttilik tileımin», dep aǵynan jaryldy.
