Mamandardyń aıtýynsha, sýrettegi qumyra XIII-XIV ǵasyrlarǵa tıesili eken. Kóne Tarazdyń órkendep, kórkeıe bastaǵan kezeńinde jasalǵan jádigerlerdiń sanatyna kiredi. Kók tústi qumyranyń joǵary jaq tusyna qustyń beınesi belgilenipti.
«Mýzeıge kelýshiler qumyra tutqasynyń joǵary jaǵyndaǵy jyltyraq materıalmen ádiptelgen qustyń beınesine nazar aýdaryp jatady. Derekke júginsek, bul qumyra 1970 jyly tómengi Baryshan qalashyǵy mańynan kezdeısoq tabylǵan.
Ortaǵasyrlyq jádiger sanalatyn qumyralardyń birazynyń tutqasynda qustyń beınesi bar ekenin baıqap júrmiz. Jalpy, yqylym zamandardaǵy ydystarda qandaı da bir janýardyń beınesi jıi kezdesedi. Mamandardyń aıtýynsha, sheberler ań men qustyń músinin salý arqyly sol kezdegi dinı ıdeıalardyń kórkemdik beınesin kórsetkisi kelgen kórinedi», deıdi oblystyq tarıhı-ólketaný mýzeıiniń zertteý jumystaryn qamtamasyz etý bóliminiń meńgerýshisi Laýra Baıtursynova.
Mamandar keltirgen derekke júginsek, ydystardaǵy janýarlardyń beınesi áýeli totemdik ıdeıalarmen sabaqtasyp jatqan bolýy yqtımal. Jalpy, jádigerlerdegi keıbir sýretter erte zamandarda belgili bir aımaqtarǵa taraǵan kórinedi. Al qumyradaǵy belgi sarmat etnostyq qaýymdastyǵyndaǵy taıpalardyń birine tıesili bolýy múmkin.
Taraz
