Fotolar: gov.kz
Osy jyldyń naýryz aıynda Qazaqstan men Qytaı «Ortalyq Azııa – Szıansý» kópfýnksıonaldy ortalyǵyn qurý týraly kelisimge kelgen edi. Eksportty qoldaý boıynsha QazTrade ulttyq operatory men Jiangsu SOHO HoldingsGroup Co Ltd halyqaralyq kompanııalar toby tıisti qujatqa qol qoıdy.
Taraptar Qytaıdyń Szıansý provınsııasynda saýda ortalyǵyn salý jobasyn júzege asyrýǵa kelisti. Saýda alańynda Qazaqstan ónimderi, al bolashaqta Ortalyq Azııa elderiniń taýarlary satylymǵa shyǵarylady.
Szıansýǵa sapary barysynda Arman Shaqqalıev kompanııa ókilderimen birqatar kezdesý ótkizip, Qazaqstan men Ortalyq Azııa elderi úshin salynǵan saýda pavılonyn aralady.
SOHO HoldingsGroup ókiliniń aıtýynsha, joba boıynsha Nankın qalasynyń damyǵan aýdanynda 11 ǵımarat salý jospary bar. Atalǵan nysandardyń barlyǵy bıznestiń jańa túrlerin, sonyń ishinde transshekaralyq nysandardy ornalastyrýǵa arnalǵan. Qazaqstan jáne Ortalyq Azııa memleketteriniń ónim óndirýshileri úshin tórt qabatty bólek pavılon qarastyrylǵan.
«Qytaı – bizdiń strategııalyq saýda seriktesimiz. Qazaqstanmen ekijaqty saýda aınalymynda jetekshi oryn alady. Memleket basshysy Qytaımen ózara saýdany 100 mıllıard dollarǵa jetkizý mindetin qoıdy. «Ortalyq Azııa – Szıansý» jobasyn júzege asyrý otandyq óndirýshilerdiń Qytaı naryǵyna shyǵýyna yqpal etip, eki el arasyndaǵy saýda-ekonomıkalyq qarym-qatynastyń keńeıýine serpin beredi», dedi Qazaqstannyń Saýda jáne ıntegrasııa mınıstri.
Sondaı-aq A.Shaqqalıev saýda pavılonynyń aýmaǵy 2 myń sharshy metrdi quraıtynyn, onyń basym bóligi otandyq taýarlar kórmesine bólinetinin atap ótti.
Jobany ázirleýshilerdiń aıtýynsha, saýda kesheniniń birinshi qabatynda qytaılyq kelýshiler úshin Qazaqstannyń mádenıeti men erekshelikteri týraly tanystyrý alańy ornalasady. Ekinshi qabatta ártúrli sanattaǵy otandyq taýarlar kórsetiledi. Qalǵan qabattarda Qazaqstan kompanııalarynyń keńseleri ornalasady.
«Biz otandyq bıznesti otandyq taýarlardyń eksporttyq áleýetin kórsetý úshin Ortalyq Azııa – Szıansý alańynda óz ónimderin belsendi túrde kórsetýge shaqyramyz. Bul rette Qytaı tarapy QazTrade kompanııasyna Qazaqstan ónimin kvota boıynsha ornalastyrýǵa aıryqsha quqyq beredi», dedi Arman Shaqqalıev óndirýshilerge.
Qytaılyq seriktesterdiń aıtýynsha, Nankındegi Ortalyq Azııa – Szıansý saýda ortalyǵynyń resmı ashylýy qyrkúıek aıyna josparlanǵan. Osyǵan oraı Saýda jáne ıntegrasııa mınıstri Arman Shaqqalıev otandyq taýar úlgilerin Qytaıdyń Szıansý provınsııasyna jóneltý úshin jedel daıyndyqty bastaýdy atap ótti.
Qazaqstannyń isker toptarynyń qatysýymen ótken kezdesýde Jiangsu SOHO HoldingsGroup Co. Ltd kompanııasynyń prezıdenti komanııanyń damý joly týraly aıtyp berdi. Sondaı-aq birlesken jobany júzege asyrý aıasynda yntymaqtastyqty keńeıtý perspektıvalaryn belgiledi. Szıansý provınsııasyndaǵy eń iri kásiporyn «Beldeý jáne jol» bastamasyna qyzmet etedi.
Kompanııa alty baǵyt boıynsha damyp keledi. Olardyń biri óndiris pen jetkizý tizbeginiń qaýipsizdigin qamtamasyz etedi, sondaı-aq aýqymdy saýda alańyn qurýda tájirıbesi mol. Halyqaralyq toptyń basym baǵyttarynyń qatarynda saýda logıstıkasyn damytýdy kózdep otyr.
Nankındegi otandyq pavılonmen qatar Qazaqstanda da osyndaı kópfýnksıonaldy ortalyq qurý josparlanyp jatyr. Keshendi alań qytaılyq jáne otandyq taýarlardyń vıtrınasynyń rólin atqaryp qana qoımaıdy, sonymen qatar munda bıznes ókilderi halyqaralyq seriktestermen kelisim-shartqa otyra alady, iskerlik kelissózder júrgizedi, qarjylyq jáne keńes berý qyzmetterin ala alady, saýda operasııalaryn rásimdeýge múmkin bolady.
Iri saýda ortalyqtaryn qurý Qytaı-Eýropa baǵyty boıynsha batys baǵytta qoıma ınfraqurylymyn salýmen qatar júredi. «QazTrade» AQ bas dırektory Jeńis О́serbaı qytaılyq seriktesterge Qazaqstanda sheteldik qoımalar salý úshin «Qorǵastyń» múmkindikterin paıdalanýdy usyndy.
«Biz SOHO HoldingsGroup-tyń aımaqtardaǵy qurylys josparlaryn, ásirese Qazaqstandaǵy bastamasyn qoldaımyz. Osy jerge ushpas buryn biz Qorǵasta bolyp, eki arnaıy ekonomıkalyq aımaqtyń ákimshiligimen kelisken bolatynbyz. Logıstıkalyq qoımalardy damytý úshin qajetti aýmaq bar. Biz úlken áleýet pen múmkindikterdi kórip otyrǵandyqtan, jobany júzege asyrýǵa bar kúsh-jigerimizdi salamyz», dedi QazTrade basshysy.
Sondaı-aq ol Nankın qalasynda ashylatyn otandyq pavılondy toltyrý úshin júrgizilip jatqan jumystar jaıynda, Ortalyq Azııa elderiniń seriktesteriniń Szıansýdaǵy kópfýnksıonaldy ortalyqty damytýǵa qatysýǵa qyzyǵýshylyqtary týraly baıandady.
Aıta ketý kerek, Qazaqstan bızneske jan-jaqty qyzmet kórsetý alańyna aınalatyn jáne saýda-ekonomıkalyq baılanystardy keńeıtýge serpin beretin, Ortalyq Azııa elderi arasyndaǵy mádenı almasýdy kúsheıtetin «Ortalyq Azııa – Szıansý» keshendi alańynyń jumysyn úılestiretin bolady.
