Foto: Týrızm jáne sport mınıstrligi
El birinshiliginde jekeleı synnan bólek, alǵash ret komandalyq jáne juptyq saıystarda jeńimpazdar anyqtalady.
Chempıonatqa qatysýshylarǵa sáttilik tilegen Máýlen Áshimbaev bochchadan ulttyq qurama múshelerin taıaýda Fınlıandııada ótken bedeldi halyqaralyq jarysta jeńip alǵan júldelerimen quttyqtady.
«Jaqynda Fınlıandııada ótken jarysta ulttyq quramamyzdyń músheleri Qýanysh Asqarbekov, Itıana Shyńǵyshanova jáne Aleksandr Qurmantaev alǵash ret qola medal jeńip aldy. Bul jyl ótken saıyn sportshylarymyzdyń kásibı deńgeıi ósip kele jatqanyn kórsetedi. Sheberlikteri shyńdalyp, ózderine degen senimdilikteri jáne iri jeńisterge degen qulshynysy artyp keledi. Az ýaqyttyń ishinde bul sporttan jaryq juldyzdarymyzdyń shyqqanyna jáne ár jarys saıyn qatysýshylardyń qatary kóbeıip kele jatqanyna qýanyshtymyn. Biz barshańyzdy maqtan tutamyz. Memleket basshysy Qasym-Jomart Kemeluly Toqaev Qazaqstanda ınklıýzııany damytýǵa únemi basa mán berip keledi. Bizdiń jetistikterimiz – osyndaı qoldaýdyń jáne úlken komandanyń birlesken jumysynyń nátıjesi», dedi Máýlen Áshimbaev.
Saltanatty is-shara barysynda Týrızm jáne sport mınıstri Ermek Marjyqpaev sóz sóılep, múmkindigi shekteýli jandarǵa arnalǵan biregeı jobaǵa qatysty pikir bildirdi.
«Bul sporttyq is-shara – elimizdegi balalar, jastar men eresekter arasyndaǵy biregeı joba. Mınıstrlik múmkindigi shekteýli jandarǵa dene shynyqtyrý jáne sportpen shuǵyldanýǵa qolaıly jaǵdaı jasalǵan. Keıingi jyldary elimizde bochcha qarqyndy damyp kele jatyr. Búginde bochchamen elimizdiń 17 óńirinde 200-den astam adam aınalysady», dedi Ermek Marjyqpaev.
Aıta keteıik, Qazaqstan ulttyq quramasynyń quramynda 26 sportshy bar. El sportshylary jyl sońyna deıin Polsha men Bahreınde ótetin eki halyqaralyq reıtıngtik jarysqa qatysýdy josparlap otyr.
Aıta keteıik, Fınlıandııanyń Lahtı qalasynda ótken saıysta Qýanysh Asqarbekov jekeleı synda qola medal oljalady. Sondaı-aq komandalyq jarysta da Qýanysh Asqarbekov, Itıana Shyńǵyshanova jáne Aleksandr Qurmantaev úzdik úshtikten kórindi. Odan bólek, jekeleı synda Itıana Shyńǵyshanova – tórtinshi, Merýert Tilebaldy – besinshi, Baljan Bólekpaeva – altynshy jáne Temirlan Altynsary segizinshi oryn alǵanyn aıta ketken jón.
