Tek sý qaıta bastaǵan sátten etno-mádenı ortalyqtardyń ókilderi, volonterler, «Assambleıa jastary», saıası partııalardyń ókilderi, memlekettik jáne azamattyq qyzmetkerler, mekemeler men uıymdardyń jumyskerleri – bári Petropavl qalasynyń alańdaryn kúl-qoqystan tazartyp, qystan qalǵan qaldyqtardy úıip, júk mashınalarymen syrtqa tasydy. Kósheler tártipke kelip, alańdar abattandyrylyp, aýlalar syrlanyp, eski, qýraǵan butaqtar kesilip, barlyq dúnıe jańaryp qaldy. Bul «Taza Qazaqstan» aksııasynyń «О́negeli urpaq» bastamasy aıasyndaǵy sharýalar edi.
Sonyń ishinde úılerin sý tasqyny basyp qalǵan shaǵyn aýdandardaǵy tazalyq jumystary qyzý júrgizildi. Munda sýmen aǵyp kelgen qoqystyń ushy-qıyry joq edi. Mine, sol aýdandarda apta saıyn senbilikter úzilissiz bolyp turdy. Atap aıtqanda, Teri zaýyty aýdanynda – 3, Zarechnyı kentinde – 2, Oıqalada – 3, Qyzyljar aýdanynyń shekarasynda ornalasqan Teplıchnyı kentinde – 1 jáne Rechport aımaǵynda 1 retten senbilik ótkizildi. Oblys aýdandarynan alynǵan aqparattarǵa qaraǵanda, Qyzyljar aýdanynyń sý basqan 18 aýlynda, Esil aýdanynyń 2 aýlynda, Taıynsha aýdanynyń 8 aýlynda, Ǵ.Músirepov aýdanynyń 2 aýlynda, Shal aqyn aýdanynyń 4 aýlynda halyq senbilikke shyǵyp, kósheler men aýlalardy qoqystan tazartýmen birge aǵash egip, kóshelerdi kórkeıtýge atsalysty.
Qyzyljardyń sý baspaǵan aýdandarynda da senbilikter ótkizildi. Sonyń ishinde «Tuńǵysh Prezıdent parkinde», Týhachevskıı kóshesinde, Dzerjınskıı burylysynda bolǵan senbilikterge 400-deı adam qatysty. Mundaǵy jastar arasynda stýdentter men volonterler, áskerı qyzmetkerler de kóp boldy.
Senbilikter kezinde jastardyń bir-birine degen ázil-qaljyńy men dostyq qarym-qatynastary olardy bir-birine jaqyndastyra tústi. «Biz birgemiz» aksııasynyń aıasynda ótkizilgen senbilikterge oblystyń 15 myńdaı adamy qatysyp, 2 myńnan artyq aǵash kóshetteri otyrǵyzyldy. Osy senbilikterde 30 myń tonna qoqys 700-deı tehnıkany paıdalanyp, qala men eldi mekenderdiń syrtyna tasyldy. Sondaı-aq 7 myńnan asa aǵashtyń túbi áktelip, taza kúıge engizildi. Buǵan qosa «Móldir bulaq» bastamasyn qoldaǵan turǵyndar aýa raıynyń áli salqyn ekenine qaramaı aýyldardyń mańyndaǵy sý toǵandaryn, kólderdi tazalaýǵa da belsene atsalysqan.
«Biz birgemiz» aksııasynyń maqsaty sý tasqynynyń zardaptaryn joıý, ártúrli etnos ókilderiniń birligin nyǵaıtý, ózara kómek pen dostyqty nasıhattaý bolsa, sonyń bári bizdiń oblysta aıqyn kórinis tapty. Senbilikter ótip jatqan jerlerge dalalyq peshter ornatylyp, kók tútin kólbeı ushyp, qazandarda ulttyq dámder pisirilip, ısi muryndy jaratyn dámdi taǵamdardyń daıyndalyp jatqany da jumys istep júrgen halyqtyń kóńil hoshyn arttyra tústi. Onyń ústine jergilikti ónerpazdardyń kúshimen ásem ánder men kóńildi kúıler de tógilip jatty. Mundaı jerlerde jumys isteýge jastardyń da yntasy arta túskeni kórinip turdy.
Biz bolǵan Mamlıýt aýdanynyń ortalyǵynda da osyndaı jumystar qyzý júrgizilip jatyr eken. Bul – Petropavl qalasynan 40 shaqyrymdaı jerde ornalasqan eldi meken. Turǵyn sany kóp bolmasa da, bul da qalanyń sanatynda. Barlyq mekeme-uıymnyń aldyn, kósheni, aýlany tazalap, syrlap jatqan halyq júr. Qala ákimi Erkin Samarhanuly da senbilikke shyqqan. «Búgin turǵyndardyń barlyǵy qalany tazartýǵa zor yntamen shyqty. Qalanyń tazalyǵy aldymen ózderine kerek ekenin halyq túsine bastaǵan sııaqty», dedi ol.
Soltústik Qazaqstan oblysy
