Saıahatshylar Qyzyltasqa asyǵady

Bul kúni О́skemennen Qyzyltasqa qaraı ir­kes-tirkes shyqqan kó­likterde esep bolmady. Ulanda uıymdastyrylǵan «Altai fest – 2024» týrıstik maý­symynyń ashylýyna sonaý Astana, Almaty, Qaraǵandy, Pavlodar, Semeı qalalarynan da saıahatshylar keldi. Aýqymdy is-sharaǵa qatysqan jurttyń bir toby Qyzyltas taýynyń ushar bıigine kóterilse, endi biri etektegi konsertti tamashalady, sadaq tartyp, saıysqa tústi. Júırik minip, jazıra dalada josqandar da joq emes.

Festıvaldyń basy-qasynda júrgen azamattardyń aıtýyn­sha, ekinshi jyl qatarynan uıym­dastyrylyp jatqan is-sharaǵa bıyl kelgen týrısterdiń sany byltyrǵymen salystyrǵanda eki ese kóp. Naqtyraq aıtsaq, Qyzyl­tastyń tóńiregine 400-den asa adam jınalǵan. Aıtyp ótken­deı, týrıstik is-shara taýǵa shy­ǵýmen ǵana shektelgen joq. Baý­raıynda oıyn-saýyq baǵdar­lamalary da oılastyrylǵan.

«Eldegi sý tasqynyna baılanysty festıval ýaqyty shegerildi. Áıtpegende, qaty­sýshylar sany budan da kóp bolar edi. Alǵashynda 700 adam keledi dep josparlaǵan. Dese de, osyndaı týrlar arqyly shyǵystyń týrızmin damytýǵa bolady. Taý basyna shyǵýǵa О́skemennen ǵana emes, Astana, Almaty, Qaraǵandy, Pavlodar, Semeı qalalarynan da qonaqtar keldi», deıdi festıvaldy uıymdastyrýshy Muhtar Toıbazarov.

Taý qatelikti keshirmeıdi. Bıiktik qaraǵan kózge ońaı kórin­genimen, taqtaıdaı jazyq soqpaq joq. Sondyqtan qutqarýshylar aldyn ala týrıster júretin tustarǵa belgi ornatty. Qaýipsizdik sharalary qatań saqtaldy. О́tip jatqan «Altai fest – 2024» tý­rıs­tik is-sharasyna oblystyń birqatar mekemesi, kásipkerler demeý­shilik kórsetti. Qusbegi Baqytbek Manaıuly ulttyq rýhty kórsetýge búrkitin kóterip, Qasym Qaısenov kentinen keldi.

Is-sharanyń eń qyzyǵy sol, árkimniń kókeıinde taý basyna kim birinshi shyǵady degen su­raq turdy. Etekten bıikke asyq­qandar kóp kúttirgen joq. Taý­dyń tóbesine qara úzip shyqqan oblystyq «Meniń ólkem» gazetiniń tilshisi Ádilhan Esimhanov edi. Al áıelder arasynan Astanadan kelgen Aıgúl Hasenova birinshi boldy.

«Geograftar 1 000 metrden assa ǵana taý dep atalady deıtin. Biraq keıbireýler úshin bul da bıik bolǵan sııaqty. Men alǵashqy toptyń birine ilinip, taý etegine deıin sońdarynan ilesip otyrdym. Ortan beline jetpeı, kóbi demala bastady. Sol kóterilgennen 8-ýchaskege deıin toqtamadym. Sosyn sońymnan kimder ilesip keledi dep artyma bir burylyp, 15 sekýndtaı aıaldadym. Sodan toqtamadym. Sha­mamen 22 mınýtta taýdyń bıiginde turdym»,  deıdi jýrnalıst ári sportshy Ádilhan Esimhanov.

Uıymdastyrýshylar bul is-sharany dástúrge aınaldyrýdy josparlap otyr. Jylda mamyrda ótetin bolsa, qatysýshylar qa­tary áli de artatyn sııaqty. Keler jyly Qyzyltastyń bıigine shyǵa­myn deseńiz, búginnen daıyndala berińiz.

Shyǵys Qazaqstan oblysy,

Ulan aýdany