Arlanmen alysqan Amanhan

Jaqynda Aıagóz aýdandyq aýrýhanasyna aýyr jaraqattanǵan Myńbulaq aýylynyń birinshi fermasynda turatyn qos azamat tústi. Amanhan Ámirov pen Ozat Qyryqbaev esimdi myńbulaqtyq eki jigit aýylǵa kirip ketken qasqyrlarmen arpalysqan naǵyz erler bolyp shyqty. Qasqyrlar aldymen Ozatqa shabýyl jasapty. Ol óz úıiniń tabaldyryǵynda turǵanda esik aldyna kelip qalǵan qasqyr atylyp, betin julyp alǵan. 50 jastaǵy jigit aǵasy úıine jan-dármen kirip úlgerip, aman qalǵan eken. Al 44 jastaǵy Amanhan Ámirov tańǵa jýyq aýyl ishine bir top ash qasqyrdyń kirgenin jáne esh seskenbesten erkin aralaǵanyn aıtady. Amanhan jubaıy Gúlzıra Dýlatovanyń ótinishimen tańǵa jýyq aýlaǵa shyqqan eken. Sol kezde alystan qarań-qurań etken birdeńeni baıqap, ony alǵashqyda úıdiń mańaıynda júretin kók tazy eken dep oılaıdy. – Qasqyr ekenin jaqyn kelgende kórdim. Taıynshadaı bóri áıelime qaraı kele jatty. Birden atyldym. Qushaqtaǵan kúıi domaladyq. Jan ushyrǵanda, qasqyrdy tamaǵynan ala túsippin. Bóriniń aýzyna basymda júrgen fonar ilinip, qatty plastmassa materıaldan jasalǵan shamdy yzalana shaınap jatqanyn sezdim. Qylǵyndyryp, alysyp júrip jelke jaǵyna shyǵyp aldym. Dalanyń taǵysy ǵoı, kúshti eken. Tipti, boı berer emes. Demde qoldarymdy shaınap tastady. Suq saýsaǵym qasqyrdyń aýzynda ketti. Taǵy bir aýnap, arqa jaǵyna shyǵyp, qatty qylǵyndyra bastaǵan edim, basyn shyǵaryp alǵan qasqyr san etimdi julyp aldy. Odan keıin ekinshi qolym qasqyrdyń aýzyna ilinip ketti. Búıirinen kerzi etikpen tepkilep otyryp, qolymdy jyrtqyshtyń aýzynan áreń shyǵardym. Bir sátte qolym qasqyrdyń alqymyna ilindi. Janushyra qımyldaǵannan ba, esimde de qalmapty. Áıteýir, jantalasyp júrip, eki qolmen qylǵyndyra bastadym. Ústine minip alyp, bar salmaǵymmen janshyp, tunshyqtyrýǵa tyrystym. Sasqalaqtaǵan áıelim pyshaq ákelip úlgerdi. Keýde tusynan eki ret batyryp edim, ash bóri únsiz qaldy, – deıdi ol. Qasqyrdyń qandy aýzynan aman qalǵan qos azamattyń qazirgi jaǵdaıy qanaǵattanarlyq. Arlanmen arpalystan keıin sanıtarlyq-epıdemıologııalyq stansa qyzmetkerleri kelip, qasqyrdy О́skemenge tekserýge jibergen eken. Al aýrýhana hırýrgi Ernar Súleımenovtiń aıtýynsha, Amanhannyń eki qolyn da qasqar shaınap tastaǵan. Bir qolynyń suq saýsaǵy joq. San etinde úlken jaraqat bar. Sonymen birge, denesiniń joǵary jaq bóliginiń kóp jeri julynǵan jáne tistelgen. Ozattyń oń jaq betin qasqyr túgeldeı julyp ketken. Arlanmen arpalysqan aýyl turǵyndaryna biraz ýaqyt em-dom qabyldaý qajet. Amanhannyń aǵaıyny Serik Baıǵalıev dala taǵysymen shaıqasta erlik kórsetken jigitterge áli operasııa jasalmaǵanyn, dárigerler SES mamandarynyń qory­tyndysyn kútip otyrǵanyn jetkizdi. Dýman ANASh, «Egemen Qazaqstan». Shyǵys Qazaqstan oblysy, Aıagóz aýdany.