Foto: Almaty qalasy ákimdiginiń baspasóz qyzmeti
Atalǵan usynys kesheli beri ǵalamtor keńistiginde qyzý talqylanyp jatyr.
Búgin Qazaqstan jáne Dúnıejúzi toǵyzqumalaq federasııalarynyń prezıdenti Álıhan Baımenov depýtattyń usynysyn qoldamaıtynyn jetkizip, resmı málimdeme jasady.
«Májilistiń birneshe depýtaty ulttyq mádenı muramyz - toǵyzqumalaqtyń atyn ózgertý qajet dep úkimetke saýal joldapty. Ǵasyrlar boıy halyq paıdalanyp kelgen tól ataýdan jırený, qasıetti uǵymdarǵa nemquraıdy qaraý - ulttyq qundylyqtar aıasynda qoǵamdy uıystyrýǵa bastamaıtyn is ekeni sózsiz. Kóziqaraqty kez kelgen adam «bular basqany qoıǵanda Abaıdy tanymaı Áýezovti oqymaǵandar ma?» dep qaıran qalǵan shyǵar. Bastamashylardyń kimdi oqıtynyn bilmeımiz, biraq qaǵıdaly aqıqatty túsinbeıtini anyq. Toǵyzqumalaq - ulttyń myńjyldyq tarıhy bar zııatkerlik oıyny», dedi Álıhan Báımenov.
Federasııa basshysy toǵyzqumalaqty IýNESKO adamzattyń mádenı murasy dep 2020 jyly moıyndaǵanyn, toǵyzqumalaq ultymyzdyń álemdik mádenıetke qosqan úlesiniń jarqyn úlgisi ekenin atap ótti.
«Syrttan kelgen adam túrli pıǵylmen ataýyn burmalasa, ondaı tásildi bizdiń mádenıet pen tarıhı jadymyzǵa qarsy syrtqy kúshter talaı qoldanǵanyn tarıhtan da bilemiz. Tarıhı, ǵylymı derekkózderde, kórkem jáne aýyz ádebıetinde, ulttyń jadynda oıyn tek toǵyzqumalaq dep atalady. Ulttyq oıynnyń ataýy Parlamentke de, Úkimetke de, toǵyzqumalaq federasııasyna da tıesili emes. Ol esh adamnyń, ne uıymnyń menshigine jatpaıdy», dedi federasııa prezıdenti.
«Oıynnyń da, onyń ataýynyń da ıesi – qazaq halqy. Bizdiń perzenttik paryzymyz – toǵyzqumalaqty damytyp, qanatyn keńge jaıý», degen Álıhan Báımenov qazir álemniń 50-den astam elinde toǵyzqumalaq kózbe-kóz oınalsa, ınternet arqyly 100 memleket turǵyndary túrli saıystarǵa qatysyp júrgenin, 6 álem chempıonaty 25-30 el ókilderiniń qatysýymen ótkenin, álemge tanymal zııatkerlik oıyndar saıttarynda toǵyzqumalaq kóshbasshy orynda turǵanyn, Qazaqstanda 210 myń adam túrli deńgeıde turaqty shuǵyldanatynyn atap ótti.
«Munyń bári ardagerler, jattyqtyrýshylar, oıynshylardyń eńbeginiń, olardy demep, qoldap júrgen federasııa, toǵyzqumalaq qaıratkerleri, kásipkerler, Sport jáne týrızm mınıstrligi men jergilikti ákimdikter, maslıhat depýtattarynyń birlese atqaryp júrgen isteriniń jemisi. Biz ári qaraı da ulttyq murany nasıhattap, dáriptep, keńirek taralýy maqsatynda jumys isteımiz. Perzenttik paryzymyzdy atqarýǵa eshkim kedergi bola almaıdy. Qazaq barda toǵyzqumalaq damı bermek. Ult aldynda zor mindetter tur. Azamat retinde el damýynyń ózekti máseleleri boıynsha joǵary minberlerden keleli oı aıtylǵanyn qalaımyz. Pikir alýandylyǵyn syılaı otyryp, qasıetti qundylyqtarmen oınaýǵa bolmaıtynyn málimdeımiz», dep túıindedi Álıhan Baımenov.
