Kollajdy jasaǵan – Almas MANAP, «EQ»
Sizge qalaı ekenin bilmeımin, biraq Abaıdyń osy óleńi meni osyndaı oıǵa batyrady. Sydyq Muhamedjanovtyń mýzykasymen shyrqalǵan úılesim úlgisi kóńilińdi eleń-alań kúıge túsiredi. Alǵashqy notalarynan-aq mınorly akkord muńǵa jetelep ketedi. Muń bolǵanda da, jaı muń emes, múbárak muń... Al qaıyrmasynda... «Júrek nalasyn bıiktete kóterip, sheksizdikke sharyqtata jutyldyryp, qanaty talǵan qyrandaı, talmaýsyrap baryp bitedi». Muny aıtýshy – óreli ónertanýshy Ilııa Jaqanov. Ras, oryndaýshysy kelisse, tyńdarmanyn tuńǵıyq shyńyraýǵa da túsirip, tym bıik shyńǵa kóteretin shyǵarma – bul.
Kúni keshe dástúrli ánshimiz Asqar Muqııat О́zbekstandaǵy «Ovoz The Voice» jobasynda Abaıdyń osy bir ǵalamat ánin shyrqady. Ekpini taý teńselter alapat barıton ıesine qol soqpaǵan jan qalmady. Súıegin sútpen jýǵandaı súısinip qaldy bári. Abaıdyń áni qalyń bir oı qushaǵyna qaldyrǵanyn jetkizdi. Iá, Asqar Súleımenovshe aıtsaq, aqyl ánge aparmaıdy, án aqylǵa aparady. Jannyń dirilin, jaýraǵanyn, tasyǵanyn – ıek artqanmen, sózdi arqalanbaı-aq – qaltqysyz jetkizetin – án.
Qazaqstan atynan baq synap kelgen Asqar Muqııat О́zbekstannyń Halyq ártisi Farrýh Zakırovten bastap, Mádenıet jáne týrızm mınıstri Ozadbek Nazarbekov, tanymal ánshi Sevara Nazarhan, Tohır Sodıkov syndy óner maıtalmandaryn tánti etti. Qobyz kómeı, aspan keýde jigittiń áni áleýmettik jelide de keńinen taralyp jatyr. Olaı bolýy zańdy da.
Zamanynda kórkemdik keńeste jas kompozıtor Sydyq Muhamedjanovtyń atalǵan týyndysyn tyńdaǵan Evgenıı Brýsılovskıı de ánge erekshe baǵa bergen. «Tamasha! Bári óz ornynda! Qısyndy, qyzyqty. Eń bastysy, munda ulttyń jany bar, jany! Máselen, «Ertarǵyn» operasyna «Elim-aı» ánin paıdalandym. Qarapaıym áýez dersiz, al onyń salmaǵy qandaı zilmaýyr. Myna jigittiń áni de osyndaı. Bir qyzyǵy, Abaıdyń ózi jazǵan sekildi bul romansty. Aıtarǵa sóz joq!», dep baǵa beredi ataqty kompozıtor.
Kúlásh Baıseıitova da shyǵarmanyń Abaı rýhymen úndes ekenin aqtaryla ashyq aıtqan. «Sezimge baı án. Oıy jınaqy, ári tereń. Evgenıı Grıgorevıch aıtqandaı, aǵylyp jatqan áýez. «Qorlanǵa» qalaı uıysaq, «Jarq etpeste» dál sondaı hál keshesiń. «Abaı joly» romanyndaǵy Abaı men Toǵjannyń sol bir sońǵy júzdesýi kóz aldymyzǵa kelgenin qarańyz. Bizdiń Tobyqty elinde Abaıdyń óz «Jarq etpesi» aıtylatyn-dy. Kele-kele ol múlde umytyldy. Ony biletin jandar búginde o dúnıelik. Al myna «Jarq etpes» sol «Jarq etpesti» tiriltkendeı boldy. Jap-jas jigittiń tolǵanysy – Abaıdyń óz tolǵanysy!», degen eken.
Iá, odan keıin birshama ýaqyt ótti. Elimizdegi mýzykalyq úderis túrlenip, sony sıpat aldy. Abaı óleńderine de jańasha ánder shyǵarylyp, tyńdarman qaýymǵa jol tartty. Jaman emes. Kópshiligi kóńilden shyǵyp jatyr. «Boıy bulǵań», «Kózimniń qarasy» sekildi ánder djaz, blıýz janrynda shyrqaldy. Alaıda eshbiri «Jarq etpestiń» bıigine shyǵa qoıǵan joq. Shyqpaýy da múmkin. Sebebi mundaı rýhanı úılesimde jaralǵan óner týyndylary bir ǵasyrda bir-aq kelýi múmkin. Abaıdyń alyp tragedııasyn ańdaǵan kompozıtor ǵana mundaı batyldyqqa bara alady.
Menińshe, bul shyǵarmanyń sońǵy notasy joq. Ári qaraı ol seniń keýdeńdi tartyla beredi. Tartyla beredi... Eshqashan toqtamaıdy...
