Keıingi birneshe kúnnen beri Qulsary qalasy turǵyndary tarapynan aýyzsýdyń laılanǵany týraly shaǵym kóbeıdi. Jylyoı aýdany ákimdiginiń málimetinshe, monoshahardy aýyzsýmen «Jylyoısý» MKK qamtıdy. Alaıda kásiporynnyń sý aıdaý stansasyndaǵy qazandarynda sý qory azaıǵan. Oǵan sebep – «Magıstraldyq Sýaǵyzǵysy» JShS-niń sý tazartý stansasy qajetti sý qorymen qamtamasyz ete almaýy.
«Sý tazartý qondyrǵylarynda sý quramy laıdan tolyq tazartylmaǵan. Qulsary qalasyna qajetti sý kólemi berilmedi. Laılaný kórsetkishi standartqa saı emes. Oblys ákimi laı sýdy jınaqtaý rezervýarlarynan aǵyzýdy, qubyrlar tolyq tazarǵansha magıstraldyq jeliden sý jiberýdi tapsyrdy», dep habarlady oblystyq jedel shtab.
Qulsaryǵa sý «Astrahan-Mańǵyshlaq» magıstraldyq qubyrymen tasymaldanady. Bul qubyrǵa sý Reseıdiń Astrahan oblysymen shekaradaǵy Qıǵash ózeninen alynady. Atalǵan qubyrǵa ıelik etetin «Magıstraldyq Sýaǵyzǵysy» JShS-niń málimetine súıensek, organoleptıkalyq kórsetkishter boıynsha tehnıkalyq sýdyń sapasy ózgerýi múmkin. О́ıtkeni «Astrahan-Mańǵyshlaq» magıstraldyq sýaǵyzǵysyn qaıta qurý jáne keńeıtý jobasynyń birinshi kezegi iske asyrylyp jatyr. Osy joba sheńberinde 56-207 shaqyrym magıstraldyq qubyr jolynyń jańa ýchaskesi paıdalanýǵa berilgen.
Atyraý oblystyq sanıtarlyq-epıdemıologııalyq baqylaý departamenti basshysynyń orynbasary Aıgúl Ysqaqovanyń aıtýynsha, Qulsary qalasyndaǵy aýyzsý sapasyna udaıy monıtorıng júrgizilip keledi. Máselen, sý tasqyny bolǵannan beri aýyzsý sapasyna baılanysty 286 synama alynǵan. Departament mamandary turǵyndarǵa qaınaǵan sýdy tutynýdy usynyp otyr.
«Jylyoısý» MKK dırektorynyń birinshi orynbasary Batyr Shákirulynyń aıtýynsha, aýyzsý tek Qulsary qalasynda ǵana emes, sonymen birge Jańaqaraton kentinde laılanǵan. Osyǵan baılanysty kommýnaldyq kásiporyn 15 mamyrdan 1 maýsym aralyǵyndaǵy kezeń úshin sý aqysyn eseptemeýge sheshim qabyldady. Mamyr aıynda jeke jáne zańdy tulǵalardyń tutynǵan sýy úshin tarıftyń tek 50 paıyz mólsherinde tólem esepteledi.
Al Jylyoı aýdandyq kásipkerlik jáne aýyl sharýashylyǵy bóliminiń basshysy Nurtas Qýatbaevtyń pikirinshe, saýda oryndarynyń ıeleri qutydaǵy sý baǵasyn ósirmeýi qajet. Bul aýyzsý tapshylyǵyn sezinip otyrǵan turǵyndar úshin janashyrlyq bolar edi.
«Qazir Qulsary qalasynda aýyzsý laılandy. Bul sýdyń sapasyna áser etip otyr. Osy oraıda aýyzsýdy tasymaldaıtyn, fıltrli avtomattar arqyly tazalap jáne dúkenderde satýmen aınalysatyn kásipkerlerden baǵany kótermeı, turaqty ustaýy qajet», dedi N.Qýatbaev.
«Teńizshevroıl» JShS-niń baspasóz qyzmetinen málim etkendeı, Jylyoı aýdanynyń belsendileri Qulsary qalasynyń turǵyndaryna aýyzsý jetkizip berýdi suraǵan. Osyǵan baılanysty kompanııa 24 myń lıtr bótelkege quıylǵan sý bólgen. Onyń ishinde 6 myń bótelkedegi sý balalar, áıelder men egde jastaǵy adamdar ornalasqan evakýasııalyq pýnktterge jetkiziledi.
«Bul kompanııa buǵan deıin tasqyn sýdan zardap shekken Qulsary qalasynyń turǵyndaryna birneshe ret kómek kórsetken edi. Aýyzsý sapasynyń tómendeýine baılanysty kompanııadan kómek suradyq. О́ıtkeni biz turǵyndardyń aýyzsý tapshylyǵyna urynbaǵanyn qalaımyz. Kompanııanyń demeýshiligimen jetkizilgen sýdy kópbalaly otbasylarǵa, qarttarǵa, barlyq turǵynǵa jetkizip beremiz», deıdi jergilikti belsendi Raısa Teleýbaeva.
Atyraý oblysy
