Eýrohattamanyń ereksheligi nede?

Saqtandyrý polısin resimdeý úshin qajetti negizgi derekter Biryńǵaı saq­tan­dyrý derekqorynyń túrli mem­le­ket­tik derekqorlarmen yqpaldasýy esebinen avtomatty túrde toltyrylady. Sony­men qatar bıyldan bastap mindetti avto­saqtandyrý boıynsha usaq jol-kó­lik oqıǵalaryn (JKO) jol polısııasyn shaqyrmaı jáne sotqa júginbeı-aq onlaın resimdeýge bolady. Mundaı ońaılatylǵan tártip Eýrohattama dep atalady.

Eýrohattama zalal mólsheri 100 AEK-ten (shamamen 370 myń teńge) aspaǵan jáne JKO qatysýshylarynda apatqa kim kináli, kimniń zardap shekkeni týraly ózara kelispeýshilikter bolmaǵan kezde resimdeledi. Osy ýaqytqa deıin mundaı jaǵdaılarda JKO qatysýshylary jol polısııasyn shaqyrmaı jáne saq­tan­dy­rý tólemine júginbeı, oqıǵa ornynda ýaǵ­dalasqan. Keltirilgen zalaldy apatqa kináli adam derbes ótegen.

Qazir Eýrohattamany resimdeý úshin JKO-ǵa qatysýshylardyń ekeýine de smartfondarǵa mobıldi qosymshany júkteý, ıdentıfıkattaýdan ótý, deklarasııa toltyrý, apat ornynan fotosýretter men beınetúsirilim jasaý qajet, sodan keıin ótinish avtomatty túrde saqtandyrý uıymyna jiberiledi. Osydan keıin ǵana apat ornynan ketýge bolady. Jol polısııasyn shaqyrýdyń jáne sotqa júginýdiń qajeti joq.

Mundaı hattamany resimdeý úshin Eýrohattamanyń mobıldi qosymshasyn paıdalaný kerek. Alaıda bul jalǵyz nusqa emes. Jekelegen saqtandyrý uıym­dary ózderiniń sıfrlyq ser­vısterin ázirledi. Eýrohattamany re­simdeý úshin olardy da paıdalanýǵa bolady.

Máselen, «Freedom Insurance» AQ-da – «DTP.kz» servısi, «Halyq» SK» AQ-da – «Halyk» qosymshasy, «Nomad Inshýrans» SK» AQ-da – «Nomad.kz» qosym­shasy bar. Keı saqtandyrý uıym­da­ry Eýrohattamany ózderiniń resmı ınternet-resýrstarynda («Basel» SK» AQ, «Munaı saqtandyrý kompanııasy» AQ) resim­deý múmkindigin usynady.