Kollajdy jasaǵan – Záýresh Smaǵul, «EQ»
Derekterge súıensek, HH ǵasyrdyń birinshi jartysynda 125 myńnan astam adam qýǵyn-súrginge ushyrady. Olardyń 25 myńdaıy atyldy. Osy qaraly jyldary elimiz kóleminde GÝLAG-tyń 20-dan astam lageri ornalasty. Jazyqsyz jazalanǵandar qatarynda kóptegen memleket jáne qoǵam qaıratkeri, ult zııalysy boldy. Ultymyz alapat ashtyqtyń da zardabyn tartyp, orny tolmas shyǵynǵa ushyrady. Ujymdastyrý naýqany qazaq baıtaǵyn buryn-sońdy bolmaǵan asa aýqymdy apatqa uryndyrdy.
Sońǵy jyldary halqymyz bastan keshken náýbet jyldardyń sebep-saldaryna taǵy da bir tereń úńilip, shynaıy baǵa berý úrdisi tyń qarqynmen beleń aldy. Oǵan Prezıdent Q.Toqaevtyń «Saıası qýǵyn-súrgin qurbandaryn tolyq aqtaý jónindegi memlekettik komıssııa týraly» Jarlyǵy eselep ekpin berdi. Komıssııa jumysynyń negizgi baǵyttary belgilenip, maqsat-mindetteri aıqyndalǵan soń, túrli baǵytta eleýli jumys atqaryldy.
Shań basyp jatqan arhıvtik qujattar júıelenip, saralanyp, tom-tom zerde kitaptary jaryqqa shyqty. Burynǵylarǵa qosymsha 311 myń zańsyz qýǵyn-súrginge ushyraǵan azamat aqtaldy. Zulmat jyldarǵa ǵylymı baǵa berý, jazyqsyz qurban bolǵandardy ádil, negizdi aqtaý jumystary áli de jalǵasady. Solaqaı saıasattan japa shekken otandastarymyzǵa qatysty tarıhı ádilettik qaıtkende qalpyna kelýge tıis. Bul – memlekettiń de, qoǵamnyń da paryzy.
Tarıhymyzdaǵy náýbetti kezeń týraly taǵylym bizdi biriktire túsedi. Osy rette Qazaqstandaǵy túrli etnos ókilderiniń tar zamandaǵy qıyndyqtary da zerttelip-zerdelene beredi. Biz árqashan saıası qýǵyn-súrgin jáne ashtyq qurbandarynyń rýhyna taǵzym etip, esimderin máńgi este saqtaımyz.
