Qurylys alańyndaǵy qımyl qaýyrt

Osydan týra bir jyl buryn, ıaǵnı 2014 jyldyń 24 sáýirinde Memleket basshysy Nursultan Nazarbaev «EKSPO-2017» kórmesi qalashyǵynyń qurylys alańyna kapsýla salyp, bolashaq keshendi qurylystyń irgetasyn qalaǵan bolatyn. Keshe osy sharanyń bir jyldyǵyna baılanysty «Astana EKSPO-2017» UK» aksıonerlik qoǵamy qazaqstandyq BAQ ókilderiniń kórme qalashyǵy qurylysy alańyna baspasóz saparyn uıymdastyrdy. Astana qalasynyń sol jaǵalaý­ynda ornalasqan kórme qalashyǵynyń aýmaǵy 174 gektar jerdi alyp jatyr. Onyń ishinde 25 gektar aýmaq EKSPO-2017-niń naqty nysandaryna, atap aıtqanda, Ulttyq pavılon «Úzdik tájirıbeler aýmaǵy» pavılony kórmege qatysatyn 100-den asa el ornalasatyn pavılondar jáne taqyryptyq pavılon keshenderi qurylysyna bólingen. Atshaptyrym aýmaqty alyp jatqan ǵasyr qurylysy alańynda jumystyń naǵyz qyzǵan shaǵy eken. Qaı jaǵyńa qarasań da, ashyq aspanǵa moıyn sozǵan tyrnalardaı boı jarystyrǵan munara krandarynan kóz súrinedi. Bir shetinen ekinshi shetine deıin kóz talatyn osy bir aýmaqty qurylys alańynda dál qazir 60 munara krany jumys istep tur. Búginge deıin ǵasyr qurylysy alańynda Astana EKSPO-2017 halyqaralyq mamandandyrylǵan kórmesiniń 38 nysanynyń irgetasy qalanyp, qurylys jumystary júrip jatyr. Qurylys alańynda 3 500 adam eńbek etýde. Jalpy, EKSPO-2017 kórmesine álemniń 100 eliniń ókilderi qatysady dep josparlanyp otyr. Búgingi kúnge deıin Astanada ótetin jahandyq kórmege qatysatyndyǵyn 23 memleket jáne 3 halyqaralyq uıym resmı túrde rastady. Olardyń arasynda Germanııa, Túrkııa, Izraıl jáne Úndistan sııaqty memleketter bar. Sonymen birge, 9 memleket bul kórmege qatysatyndyǵyn aýyzsha rastap otyr. Kórme qalashyǵy qurylys alańynda ótken baspasóz sapary barysynda jýrnalıster kórme nysandarynyń qurylysyn salý jumystarynyń barysymen jan-jaqty tanysty. Qurylys alańyndaǵy sapardan keıin «Astana EKSPO-2017» UK» AQ basqarma tóraǵasynyń orynbasary Murat Omarov, aksıonerlik qoǵam basqarma tóraǵasynyń keńesshisi Qanaǵat Tilemisov jáne «Astana EKSPO-2017» UK» AQ-tyń departament dırektory Erjan Meıramov jýrnalıstermen baspasóz máslıhatyn ótkizdi. Jahandyq kórme qalashyǵynyń nysandary boı kóteretin ǵasyr qurylysy alańynda atqarylyp jatqan keshendi jumystar haqynda gazetimizdiń aldaǵy sandarynda jaryq kóretin arnaýly bette keń kólemde maǵlumat beriletin bolady. Jylqybaı JAǴYPARULY, «Egemen Qazaqstan».