Foto: Aqorda baspasóz qyzmeti
Prezıdent Qasym-Jomart Toqaev Ngozı Okondjo-Ivealaǵa iltıpat bildire otyryp, Qazaqstan Dúnıejúzilik saýda uıymymen yntymaqtastyqty keńeıtýge aıryqsha mán beretinin atap ótti.
«Sizdiń basshylyǵyńyzben kópjaqty halyqaralyq saýda júıesi qazirgi kedergilerdi joıýǵa jáne teń jaǵdaı jasaýǵa baǵyttalǵan úlken transformasııadan ótetinine senimdimiz. Sizdiń Almatyǵa saparyńyzdyń mańyzy zor. Osy múmkindikti paıdalana otyryp, tyǵyz yntymaqtastyǵymyz úshin ózińizge rızashylyǵymdy bildirgim keledi. Uıymǵa múshe elder mınıstrleriniń 12-shi konferensııasyna tóraǵalyq etý – Qazaqstan úshin úlken jaýapkershilik ári mártebe. Atalǵan jıyn barysynda DSU músheleri uıymdy reformalaý týraly mańyzdy sheshimder qabyldaı aldy», dedi Prezıdent.
Memleket basshysynyń aıtýynsha, kúsheıip kele jatqan jahandyq proteksıonızm men saýda shekteýlerine qaramastan, Qazaqstan ekonomıkasy ashyq el retinde óz pozısııasyn nyǵaıta túsýge umtylady. Qazirgi kezde biz álemniń 180 elimen saýda-sattyq jasaımyz. Sońǵy úsh jylda elimizdiń syrtqy saýdasynyń kólemi 53 paıyzǵa ulǵaıyp, 160 mıllıard dollarǵa jetti.
Prezıdent jýyrda Ekonomıkany yryqtandyrý jónindegi sharalar týraly Jarlyqqa qol qoıǵanyn jetkizdi. Bul qujat ádil básekeni kúsheıtýge, kásipkerlik erkindikti saqtaýǵa jáne memlekettiń ekonomıkadaǵy úlesin azaıtýǵa baǵyttalǵan.
О́z kezeginde Ngozı Okondjo-Iveala DSU-ǵa múshe elder mınıstrleriniń 12-shi konferensııasynyń tóraǵasy retinde halyqaralyq saýda salasyndaǵy mańyzdy sheshimderdi qabyldaýǵa Qazaqstannyń qosqan úlesin joǵary baǵalady.
Prezıdent osy kúnderi Almatyda ótip jatqan Ortalyq Azııanyń saýda saıasaty jónindegi Ekinshi forýmynyń óńirdegi ekonomıkalyq yntymaqtastyq pen saýda-sattyqty ilgeriletý, sondaı-aq kórshiles elderdi kópjaqty saýda júıesine ıntegrasııalaý turǵysynan máni zor ekenine nazar aýdardy.
Kezdesý sońynda Qasym-Jomart Toqaev Ngozı Okondjo-Ivealanyń kópjaqty saýda júıesin jáne Dúnıejúzilik saýda uıymynyń rólin nyǵaıtý isine qosqan úlesin Qazaqstan tarapy joǵary baǵalaıtynyn atap ótip, ony II dárejeli «Dostyq» ordenimen marapattady.
