Abaı oblysynda bir apta buryn iz-túzsiz joǵalǵan qyzdyń óli denesi tabyldy. 30 jastaǵy Dınara Dosymbekovany óltirdi degen kúdikpen týǵan anasy qamaýǵa alyndy.
KTK arnasy jazǵandaı, marqum 26 mamyr kúni joǵalyp ketken. Onyń iz-túzsiz joǵalǵanyn aıtyp anasy polısııaǵa aryz túsiripti. Tipti aýyldan Semeı qalasyna barmaq bolyp, «qyzym taksıge minip ketti» dep ótirik aıtqan. Alaıda shahardaǵy beınebaqylaý kameralaryn túgel tekserip, sharq-uryp izdegen polısııa qyzmetkerleri Dınarany tappady. Tek bir aptadan keıin óz qyzyn óltirip, múrdesin jasyryp tastady degen kúdikpen týǵan anasy ustaldy.
Qazir qandyqol áıel qamaýǵa alynyp, tergeý júrgizilip jatyr.
«Polısııa qyzmetkerleri qabyldaǵan sharalardyń nátıjesinde 30 jastaǵy qyzdyń joǵalyp ketý mán-jaıy anyqtaldy. Kisi óltirý faktisi boıynsha sotqa deıingi tergeý bastaldy. Kúdikti áıel qamaýǵa alyndy. Tergeý júrgizilip jatyr, saraptamalar taǵaıyndaldy», – dedi Abaı oblysy PD bastyǵynyń orynbasary Eldos Zákimov.
