1 maýsym – Balalardy qorǵaý kúnine oraı elordalyq Trıatlon saıabaǵynda ótken «Charity Samruk Marathon – 2024» qaıyrymdylyq marafony salamatty ómir saltyn ustanatyn ári jomart júrekti otandastarymyzdyń basyn qosty.
Buqaralyq júgirýge bas-aıaǵy 1200-den astam jelaıaq qatysty. Olardyń basym kópshiligi – «Samuryq-Qazyna» AQ kompanııalar tobynyń qyzmetkerleri.
Eresekter 5 jáne 10 shaqyrymdardy baǵyndyrsa, 200-den astam balalar men jasóspirimder 400 jáne 1000 metrge júgirdi.
«Búgingi shara salamatty ómir salty men buqaralyq sportty nasıhattap qana qoımaıdy. Eń bastysy, biz bir aıdyń kóleminde 125 mln teńgeden astam qarajat jınadyq, bul qarajattyń barlyǵy Astana qalasyndaǵy mektepter men balabaqshalarda ınklıýzıvti kabınetter ashýǵa jumsalady», dep atap ótti «Samuryq-Qazyna» AQ basqarma tóraǵasy Nurlan Jaqypov.
Jalpy, «Samuryq-Qazyna» – elimizde qaıyrymdylyqqa erekshe kóńil bólip otyrǵan qurylym.
«Bıyl sý tasqynynan zardap shekken óńirlerge biz 22 mlrd-tan astam qarajat bóldik. Onyń ishinde 10 mlrd «QazMunaıGaz», 3 mlrd «Qazatomprom», 3 mlrd «QazaqstanTemirJoly», 2 mlrd «Samuryq-Qazyna», 1 mlrd «KEGOC», 1 mlrd «Samuryq-Energo», 1 mlrd «QazaqGaz», 1 mlrd «Air Astana». Budan bólek, qarjylaı kómekpen qatar Qor kompanııalar toby tegin janarmaı, arnaıy tehnıka, jumysshylar kúshin bólse, «QTJ», «Air Astana», «QazaqEır» arqyly tegin tasymaldaý qyzmeti kórsetildi, deıdi «Samuryq-Qazyna» qorynyń basshysy.
Jyl saıyn «Samuryq-Qazyna» kompanııalar toby atynan jarty mıllıonnan astam otandasymyzǵa áleýmettik kómek kórsetiledi. Olardyń 97 myńǵa jýyǵy – balalar men analar.
Marafon qatysýshylaryn qoldaý úshin olardyń otbasy músheleri de keldi, jalpy sporttyq sharaǵa barlyǵy 2 myńnan astam adam qatysty.
Qor júgirýge nıet bildirgen jandarǵa marafonǵa deıin bir aı boıy ár senbi saıyn tájirıbeli jattyqtyrýshymen daıyndalýǵa múmkindik jasaǵan.
Osylaısha, salamatty ómir saltyna den qoıǵan azamattar men jomart jandardyń arqasynda kishkentaı baldyrǵandar jarqyn bolashaqqa, salamatty jáne baqytty ómir súrýge múmkindik aldy.
Jappaı júgirý aıaqtalǵan soń marafon qatysýshylary men eriktiler toby Memleket basshysynyń «Taza Qazaqstan» jalpyulttyq ekologııalyq aksııasyn qoldaý maqsatynda saıabaq aýmaǵyn qoqystan tazalap shyqty.
Aqmaral BAIаZITOVA
